سابق سینیٹر الیاس احمد بلور اپنے آبائی قبرستان میں سپرد خاک
پشاور کے مشہور صنعتکار اور سابق سینیٹر الیاس احمد بلور کو اپنے آبائی قبرستان میں سپردخاک کر دیا گیا، ان کے نماز جنازہ میں ہزاروں لوگوں نے شرکت کی۔
خاندانی ذرائع کے مطابق الیاس بلور گردوں کے عارضے میں مبتلا تھے اور اسلام اباد میں نجی ہسپتال میں زیر علاج تھے، گزشتہ شب ان کی حالت بگڑ گئی اور خالق حقیقی سے جاملے۔
مرحوم کی ایصال ثوب اور دعا کے لیے بلور ہاوس میں لوگوں کی آمد کا سلسلہ جاری ہے۔
صدر مملکت آصف علی زرداری اور وزیراعظم شہباز شریف نے سابق سینیٹر اور عوامی نیشنل پارٹی کے رہنما الیاس احمد بلور کے اِنتقال پر تعزیت کا اظہار کیا ہے۔
ہفتہ کو ایوان صدر پریس ونگ سے جاری بیان کے مطابق صدر مملکت نے مرحوم کے اہل خانہ کے ساتھ تعزیت اور ہمدردی کا اِظہار کیا۔
صدر مملکت نے الیاس احمد بلور مرحوم کیلئے دعائے مغفرت، ورثا کیلئے صبر جمیل کی دعا کی۔
ہفتہ کو وزیر اعظم آفس کے میڈیا ونگ سے جاری بیان کے مطابق وزیر اعظم نے کہا کہ الیاس احمد بلور کی عوام کی فلاح و بہبود کے لیے ناقابل فراموش خدمات ہیں،الیاس احمد بلور نے بطور سینیٹر عوام کی بہترین نمائندگی کی۔
وزیراعظم نے کہا کہ مرحوم کی سیاسی خدمات یاد رکھی جائیں گی،الیاس احمد بلور کے وصال سے سیاسی منظر نامے میں پیدا ہونے والے خلا کو پر کرنا بہت مشکل ہے۔
واضح رہے کہ سابق سینیٹر الیاس احمد بلور نے عملی سیاست کا آغاز نیشنل پارٹی کی رکنیت سے کیا تھا، وہ قومی اسمبلی کے رکن اور سینیٹر بھی رہ چکے ہیں جب کہ سرحد چیمبر آف کامرس کے صدر اور مختلف چیمبرز کے اعلی منتخب عہدوں پر بھی رہے۔
لائیو ٹی وی