اسٹاک ایکسچینج میں مندی، انڈیکس 910 پوائنٹس گر گیا
پاکستان اسٹاک ایکسچینج میں کاروباری ہفتے کے پہلے روز مندی کا رجحان رہا اور بینچ مارک کے ایس ای-100 انڈیکس میں 910 پوائنٹس کی تنزلی ہوئی۔
پی ایس ایکس ویب سائٹ کے مطابق دوپہر تقریباً 12 بج کر 42 منٹ پر کے ایس ای-100 انڈیکس 910 پوائنٹس یا 1.12 فیصد کمی کے بعد 80 ہزار 381 پر آگیا۔
تاہم کاروبار کے اختتام میں انڈیکس قدرے بحالی کے بعد 177 پوائنٹس یا 0.22 فیصد تنزلی سے 81 ہزار 114 پر آ گیا، جو گزشتہ روز 81 ہزار 292 پر بند ہوا تھا۔
اے کے ڈی سیکیورٹیز کے ڈائریکٹر ریسرچ اویس اشرف نے نوٹ کیا کہ دو اہم اسٹاک حب پاور اور ماڑی پیٹرولیم کے حصص میں فروخت کا دباؤ ہے، جس نے انڈیکس کو نیچے لے جانے میں اہم کردار ادا کیا۔
انہوں نے مزید کہا کہ ہمیں توقع ہے کہ آئی ایم ایف کی جانب سے قرض پروگرام کی منظوری سے معیشت پر مثبت اثر پڑے گا کیونکہ اس سے بیرونی کھاتوں میں استحکام آئے گا۔
نیکسٹ کیپٹل لمیٹڈ کے ڈائریکٹر ریسرچ شہاب فاروق نے اس منفی رجحان کو مشرق وسطی میں مجموعی صورتحال کی وجہ قرار دیا۔
واضح رہے کہ 26 ستمبر کو عالمی مالیاتی فنڈ (آئی ایم ایف) کی جانب سے 7 ارب ڈالر کے بیل آؤٹ پیکج کی منظوری کے باوجود اسٹاک ایکسچینج میں ابتدائی ٹریڈنگ کے دوران تیزی کا رجحان مندی میں تبدیل ہو گیا تھا اور انڈیکس میں 589 پوائنٹس کی کمی ہوئی تھی۔
اس سے ایک روز قبل بینچ مارک کے ایس ای-100 انڈیکس میں 764 پوائنٹس اضافے سے 82 ہزار کی نفسیاتی حد بحال ہو گئی تھی۔
لائیو ٹی وی