لاہور: عمر سرفراز چیمہ نےعسکری ٹاور جلاؤ گھیراؤ مقدمے میں ضمانت کی درخواست دائر کردی
سابق گورنرپنجاب اور رہنما پاکستان تحریک انصاف (پی ٹی آئی) عمر سرفراز چیمہ نے عسکری ٹاور جلاؤ گھیراؤ کے مقدمے میں ضمانت کی درخواست انسداد دہشت گردی عدالت لاہور میں دائر کردی۔
عمر سرفراز چیمہ نے اپنے وکیل کی وساطت سے ضمانت کی درخواست دائر کی۔
درخواست میں مؤقف اپنایا گیا ہے کہ عسکری ٹاور جلاؤ گھیراؤ میں ملوث نہیں ہوں، سیاسی بنیادوں پر مقدمے میں نامزد کیا گیا۔
درخواست میں استدعا کی گئی ہے کہ عدالت ضمانت کی درخواست منظور کرکے رہائی کا حکم دے۔
خیال رہے کہ 9 مئی کو القادر ٹرسٹ کیس میں بانی پاکستان تحریک انصاف (پی ٹی آئی) عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا جس کے دوران فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔
مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاؤس بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو)کا ایک گیٹ بھی توڑ دیا تھا۔
اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی کے کارکنوں کے خلاف مقدمات بھی درج کیے گئے تھے۔
لائیو ٹی وی