سندھ میں کرکٹ کے بنیادی ڈھانچے، تربیتی سہولیات کی ضرورت ہے، صدر مملکت
صدر مملکت آصف علی زرداری نے کہا ہے کہ سندھ میں کرکٹ کے بنیادی ڈھانچے، تربیتی سہولیات کی ضرورت ہے اور نوجوانوں کو جدید کوچنگ ، رہنمائی کے مواقع فراہم کرنا ہوں گے جب کہ جدید کرکٹ اسٹیڈیمز کے لیے مشترکہ منصوبوں کے امکانات پرغور کیا جائے۔
ڈان نیوز کے مطابق صدر مملکت آصف علی زرداری سے سندھ پریمیئر لیگ (ایس پی ایل) کے وفد نے ملاقات کی، وفد نے صدر مملکت کو سندھ پریمیئر لیگ کو درپیش مسائل کے بارے میں بھی آگاہ کیا۔
ایس پی ایل کے وفد نے صدر مملکت کو سندھ میں کرکٹ ٹیلنٹ فروغ دینے ، کرکٹ انفراسٹرکچر بہتر بنانے میں لیگ کے کردار بارے میں بتایا۔
وفد نے سندھ پریمیئر لیگ کے افتتاحی سیزن کی کامیابیوں پر روشنی ڈالتے ہوئے کہا کہ نوجوان ٹیلنٹ کی تربیت کے لیے کراچی میں ایک ہائی پرفارمنس مرکز کا قیام عمل میں لایا جائے گا۔
وفد نے صدر مملکت کو سندھ پریمیئر لیگ کو درپیش مسائل کے بارے میں بھی آگاہ کیا جب کہ صدر مملکت کی وفد کو سندھ میں کرکٹ کی حوصلہ افزائی ، فروغ کے لیے تعاون کی یقین دہانی کروائی۔
اس موقع پر صدر پاکستان نے سندھ کا کرکٹ ٹیلنٹ پروان چڑھانے کی ضرورت پر زور دیتے ہوئے کہا کہ سندھ میں کرکٹ کے بنیادی ڈھانچے ، تربیتی سہولیات بہتر بنانے کی ضرورت ہے۔
انہوں نے کہا کہ سندھ کے نوجوانوں کو جدید کوچنگ اور رہنمائی کے مواقع فراہم کرنا ہوں گے ، جدید کرکٹ اسٹیڈیمز کی تیاری کے لیے مشترکہ منصوبوں کے امکانات پر غور کیا جائے۔
ان کا کہنا تھا کہ سندھ پریمیئر لیگ سندھ کا کرکٹ ٹیلنٹ اجاگر کرنے کے لیے ایک بہترین پلیٹ فارم ہے۔
صدر مملکت نے صوبے میں کرکٹ کے فروغ کیلئے ایک جامع طویل المدتی روڈ میپ وضع کرنے کی ضرورت پر زور دیتے ہوئے کہا کہ کھیلوں اور کرکٹ لیگز کے انعقاد سے کھیلوں کی سیاحت ، معاشی سرگرمیوں کو فروغ ملے گا۔
انہوں نے مزید کہا کہ سندھ حکومت اور پاکستان کرکٹ بورڈ کو سندھ میں کرکٹ کا بنیادی ڈھانچہ بہتر بنانے کیلئے معاونت کا کہوں گا۔
بعد ازاں ، سندھ پریمیئر لیگ کے وفد نے صدر مملکت کو ایس پی ایل کی شرٹ بھی پیش کی۔
لائیو ٹی وی