الکاراز ومبلڈن اوپن کے دفاع میں کامیاب، جوکووچ کا 25واں گرینڈ سلیم جیتنے کا خواب چکنا چور
اسپین کے 21سالہ ٹینس اسٹار کارلوس الکاراز نے عالمی شہرت یافتہ ٹینس اسٹار نوواک جوکووچ کا ریکارڈ 25واں گرینڈ سلیم ٹورنامنٹ جیتنے کا خواب چکنا چور کرتے ہوئے انہیں ومبلڈن اوپن کے فائنل میں شکست دے دی۔
ٹینس کے شائقین کو فال کے سب سے بڑے ومبلڈن اوپن فائنل میں ایک دلچسپ مقابلے کی امید تھی کیونکہ گزشتہ مرتبہ بھی یہی دونوں حریف ایک دوسرے کے آمنے سامنے تھے۔
ومبلڈن اوپن کا فائنل دیکھنے کے لیے کینسر کے مرض سے لڑتی برطانوی شہزادی کیٹ مڈلٹن اور ان کی صاحبزادی شہزادی چارلٹ بھی موجود تھیں اور کیٹ مڈلٹن کا کورٹ میں آمد پر حاضرین نے کھڑے ہو کر اور تالیاں بجا کر پرتپاک استقبال کیا۔
لیکن گزشتہ سال جوکووچ اور الکاراز کے درمیان پانچ سیٹوں پر محیط اور 4 گھنٹے 42 تک جاری رہنے والا سنسنی فائنل میچ اس مرتبہ شائقین کو دلچسپ مقابلہ دیکھنے کو نہیں ملا۔
نوجوان اسٹار نے 24 مرتبہ کے گرینڈ سلیم چیمپیئن کو محض ڈھائی گھنٹے کے بعد مقابلے کے بعد اسٹریٹ سیٹس میں شکست دے کر لگاتار دوسری مرتبہ ومبلڈن اوپن چیمپیئن شپ جیتنے کا اعزاز حاصل کر لیا۔
7 مرتبہ کے ومبلڈن چیمپیئن کی کچھ عرصہ قبل ہی گھٹنے کی سرجری ہوئی تھی اور وہ اس سال کوئی بھی ایونٹ میں جیتنے میں ناکام رہے ہیں۔
ریکارڈ 25واں گرینڈ سلیم جیت کر عالمی ریکارڈ بنانے کا خواب لے کر کورٹ میں اترنے والے سربیا کے سپر اسٹار اس بار فائنل میں بالکل بے بس نظر آئے جس اندازہ اس بات سے لگایا جا سکتا ہے کہ الکاراز نے پہلے دونوں سیٹس 75منٹ سے بھی کم وقت میں 2-6، 2-6 سے اپنے نام کر لیے۔
تاہم اگلے سیٹ میں جوکووچ نے نوجوان ہسپانوی کھلاڑی کے خلاف نسبتاً مزاحمت دکھائی اور وہ بریک پوائنٹ بھی حاصل کرنے میں کامیاب رہے البتہ 21سالہ نوجوان کی پھرتی کے سامنے 37سالہ اسٹار کا تجربہ بھی رائیگاں گیا۔
تیسرا سیٹ ٹائی بریک پر گیا لیکن الکاراز نے جوکووچ کو میچ میں واپسی کا موقع نہ دیا اور 7-6 سے سیٹ اپنے نام کر کے ومبلڈن اوپن کا کامیابی سے دفاع کیا اور چیمپیئن بننے کا اعزاز حاصل کر لیا۔
اس فتح کے ساتھ ہی الکاراز یکے بعد دیگرے فرنچ اور ومبلڈن اوپن جیتنے والے دنیا کے محض چھٹے کھلاڑی بھی بن گئے۔
الکاراز کے گرینڈ سلیم ٹورنامنٹس کی تعداد چار ہو گئی ہے اور وہ اوپن ایرا میں 21سال یا اس سے کم عمر میں چار گرینڈ سلیم جیتنے والے بورس بیکر، بی جورن بورگ اور میٹس ویلنڈر کی صف میں شامل ہو گئے ہیں۔
لائیو ٹی وی