لاہور میں ایک دن میں زیادہ بارش کا 44سالہ ریکارڈ ٹوٹ گیا
لاہور میں مون سون کے تیسرے اسپیل میں بارش کا 44سالہ ریکارڈ ٹوٹ گیا اور ایک دن میں لاہور میں 315 ملی میٹر بارش ریکارڈ کی گئی۔
ڈان نیوز کے مطابق لاہور میں جمعہ کو ہونے والی بارش نے جل تھل ایک کر دیا اور بارش سے لاہور کے متعدد علاقے ندی نالوں کا منظر پیش کرنے لگے جبکہ پانی گھروں میں داخل ہو گیا۔
ریکارڈ بارش کے باعث شہر کا بیشتر حصہ تالاب کا منظر پیش کرنے لگا اور بجلی کا نظام بھی بری طرح متاثر ہوا۔
لاہور کے تاج پورہ میں سب سے زیادہ 315 ملی میٹربارش ریکارڈ کی گئی جبکہ لکشمی چوک، جوہر ٹاؤن، گلشن راوی، ہربنس پورہ، سبزہ زار اور دیگر علاقوں میں شدید بارش ریکارڈ کی گئی۔
تاج پورہ کے علاقے میں بارش کا پانی گھروں میں داخل ہوگیا جس سے علاقہ مکینوں کو دشواری کا سامنا کرنا پڑا۔
ڈپٹی کمشنرلاہور نے واضح کیا کہ محکمہ موسمیات نے شام سے بارش کا امکان ظاہر کیا تھا تاہم اس کے برعکس صبح سویرے ہی بارش تسلسل سے جاری ہے۔
بارش کے باعث لاہورکے متعدد فیڈرز ٹرپ ہونے سے بجلی کی ترسیل کا نظام بھی بری طرح متاثر رہا۔
دوسری جانب بارش سے لاہور میں ایک دن میں سب زیادہ بارش کا 44سالہ ریکارڈ ٹوٹ گیا۔
مون سون کی آج ہونے والی بارش میں 315 ملی میٹر بارش ریکارڈ کی گئی جہاں اس سے قبل اتنی بارش 44سال قبل ریکارڈ کی گئی تھی۔
گزشتہ برس سب سے زیادہ 291 ملی میٹر بارش لکشمی چوک پر ریکارڈ کی گئی تھی۔
لائیو ٹی وی