شنگھائی تعاون تنظیم غزہ میں اسرائیلی بربریت کی مذمت کرے، اسحٰق ڈار
نائب وزیراعظم وزیر خارجہ اسحٰق ڈار کا کہنا ہے کہ شنگھائی تعاون تنظیم غزہ میں اسرائیلی بربریت کی مذمت کرے۔
شنگھائی تعاون تنظیم کے وزرائے خارجہ کونسل کے اجلاس سے خطاب کرتے ہوئے وزیر خارجہ اسحٰق ڈار نے کہا کہ یہ اہم علاقائی فورم ہے اور اس فورم کا قیام انتہائی اہم ہے، شنگھائی تعاون تنظیم کے ممالک سے تعلقات کا فروغ پاکستان کی ترجیحات میں شامل ہے۔
انہوں نے کہا کہ شنگھائی تعاون تنظیم میں شامل تمام ممالک کے ایک دوسرے سے تاریخی ثقافتی وسفارتی تعلقات ہیں، اس فورم سے درپیش چیلنجز کا حل تلاش کیا جائے۔
وزیر خارجہ نے کہا کہ دہشت گردی دنیا بھر کے لیے ایک چیلنج بن چکی ہے، ہر قسم کی دہشت گردی کی مذمت کرتے ہیں، دہشت گردی کے خاتمے کے لیے اقدامات کرنا ہوں گے۔
انہوں نے کہا کہ امن واستحکام کے لیے مشترکہ ایجنڈا ترتیب دینا ہوگا، گلوبل سیکیورٹی کے لیے اقدامات ضروری ہیں، متنازعہ علاقوں کے حوالے سے اقوام متحدہ کو اقدامات کرنے چاہیے، جب کہ عالمی برادری عبوری افغان حکومت سے بات کرے۔
اسحٰق ڈار کا کہنا تھا کہ شنگھائی تعاون تنظیم غزہ میں اسرائیلی بربریت کی مذمت کرے، 1967 سے پہلے کی پوزیشن پر فلسطینی ریاست قائم کی جائے، مسئلہ فلسطین کا واحد حل دو ریاستوں کا قیام ہے، فلسطین میں 35 ہزار سے زائد معصوم شہریوں کو شہید کیا گیا۔
لائیو ٹی وی