شوہرکو شادی سے قبل بھائی بولا تو انہیں غصہ آگیا تھا، عائشہ جہانزیب
ٹی وی میزبان و اداکارہ عائشہ جہانزیب نے انکشاف کیا ہے کہ شادی سے قبل دوسرے شوہر سے جب انہوں نے پہلی بار بات کی تو انہوں نے بھائی بلانے پر ان پر غصہ کیا تھا۔
عائشہ جہانزیب نے 2013 میں بطور شریک ٹی وی میزبان کیریئر کا آغاز کیا تھا، جس کے بعد وہ متعدد مزاحیہ پروگراموں کی شریک میزبان رہیں اور بعد ازاں انہوں نے اپنے پروگرامات بھی شروع کیے۔
حال ہی میں انہوں نے اداکاری کا آغاز کیا ہے اور وہ ان دنوں برنس روڈ کی رومیو جولٹ نامی ڈرامے میں کردار ادا کررہی ہیں۔
عائشہ جہانزیب نے فوچیا میگزین سے بات کرتے ہوئے بتایا کہ شادی سے قبل دوسرے شوہر کو جب انہوں نے بھائی بولا تو وہ غصہ میں آگئے اور انہیں سختی سے منع کیا کہ وہ انہیں بھائی نہ بلائیں۔
اداکارہ نے بتایا کہ پہلے شوہر جہانزیب کی کینسر میں موت کے کئی سال بعد انہوں نے والدہ کے کہنے پر دوسری شادی حارث سے کی، جن سے انہیں دو بچے ہو چکے ہیں۔
عائشہ جہانزیب کا کہنا تھا کہ حارث سے شادی کرنے کے باوجود انہوں نے اپنے نام کے ساتھ پہلے شوہر کا نام لگا رکھا ہے، جس پر بہت سارے لوگوں کو حیرانگی بھی ہوتی ہے اور انہیں طعنے بھی دیے جاتے ہیں۔
انہوں نے بتایا کہ ان کا دوسرے شوہر حارث سے کسی خاتون دوست کے توسط سے ٹریولنگ کی غرض سے رابطہ ہوا تھا جو پہلے دوستی اور بعد ازاں رشتے میں تبدیل ہوگیا۔
ان کے مطابق انہوں نے پہلی بار حارث پر فون سے بات کی اور انہیں بھائی بولا، جس پر وہ ناراض ہوگئے اور انہیں کہا کہ وہ آئندہ انہیں بھائی نہ بلائیں۔
اداکارہ کے مطابق وہ پہلے شوہر کے تین بچوں کے ہمراہ دبئی جانا چاہتی تھیں، اس لیے انہوں نے حارث سے ٹکٹس کروانے کی مدد لی اور اسی دوران ان کے درمیان دوستی ہوگئی جو رشتے میں تبدیل ہوگئی۔
ان کا کہنا تھا کہ دوسری شادی کرتے وقت ان کے پہلے شوہر کے سب سے بڑے بیٹے کی عمر 10 سال، دوسری بیٹی کی 7 اور سب سے چھوٹی بیٹی کی 5 سال تھی اور بعد ازاں انہیں دوسرے شوہر سے بھی دو بچے ہوئے۔
عائشہ جہانزیب نے یہ انکشاف بھی کیا کہ ان کے شوہر کے پہلے بچوں کے نام کے ساتھ والد کا نہیں بلکہ دادا کا نام لگا ہوا ہے جب کہ انہوں نے مرحوم شوہر کا نام اپنے ساتھ لگاکر رکھنے کا فیصلہ کیا اور دوسرے شوہر نے بھی خوشی سے اس کی اجازت دی۔
انہوں نے بتایا کہ معاشی بہتری کے لیے انہوں نے ٹی وی کیریئر کا آغاز کیا اور ان کے دوسرے شوہر نے ہی والدہ سے انہیں ٹی وی میں کام کرنے کی اجازت دلوائی۔
اداکارہ کا کہنا تھا کہ ان کی والدہ کو ہمیشہ یہ ڈر ہوتا تھا کہ ان کی بیٹی ٹی وی انڈسٹری میں جانے کے بعد خراب ہوجائے گی۔
لائیو ٹی وی