اسلام آباد: سرمایہ کاری کے نام پر لوگوں کو لوٹنے والا سابق فوجی افسر گرفتار
سرمایہ کاری کے نام پرسادہ لوح لوگوں کو لوٹنے والے سابق فوجی افسر کو اسلام آباد سے گرفتار کر لیا گیا۔
ڈان نیوز کے مطابق میجر ریٹائرڈ شوکت اللہ مروت آئی اسمارٹ نامی کمپنی میں سرمایہ کاری کے لیے پیسہ بٹورتا رہا۔
ملزم کے خلاف درج مقدمے کے مطابق شوکت اللہ مروت مختلف منصوبے میں سرمایہ کاری اور بھاری منافع کا لالچ دے کر لوگوں کو راغب کرتا تھا لیکن سرمایہ کاری کروانے کے بعد ملزم نہ منافع دیتا تھا اور نہ ہی کالز اٹینڈ کرتا تھا۔
پولیس کو ملزم کے خلاف دھوکا دہی اور فراڈ کی متعدد شکایت موصول ہوئی تھیں جس کے بعد تھانہ شالیمار پولیس نے ڈپلومیٹک ایریا سے ملزم کو گرفتار کیا۔
میجر ریٹائرڈ شوکت اللہ مروت کا پولیس نے مقامی عدالت سے تین روزہ جسمانی ریمانڈ بھی حاصل کرلیا جہاں عدالت میں پیشی کے موقع پر پولیس کی جانب سے ملزم کو موبائل سمیت دیگر سہولیات فراہم کی گئی تھیں۔
میجر ریٹائرڈ شوکت اللہ مروت کی کمپنی آئی اسمارٹ کو سیکیورٹی اینڈ ایکسچینج کمیشن آف پاکستان نے پہلے ہی غیر قانونی قرار دیا تھا۔
ملزم شوکت اللہ مروت کے خلاف ایف آئی اے نے منی لانڈرنگ کی انکوائری بھی شروع کر رکھی ہے جبکہ نیب کراچی بھی ملزم کے خلاف انکوائری کر رہی ہے۔
لائیو ٹی وی