الیکشن کمیشن کے پاس بیلٹ پیپرز کی چھپائی کیلئے اضافی کاغذ ختم ہوگیا
الیکشن کمیشن آف پاکستان کے پاس بیلٹ پیپرز کی چھپائی کے لیے خصوصی فیچرز والا اضافی کاغذ ختم ہوگیا۔
ڈان نیوز کے مطابق سپریم کورٹ کے فیصلوں کی روشنی میں 47 حلقوں میں دوبارہ بیلیٹ پیپرز کی چھپائی کا حکم دیا گیا تھا، ذرائع الیکشن کمیشن کا کہنا ہے کہ حلقوں میں دوبارہ بیلیٹ پیپرز کی چھپائی سے کاغذ کی کمی ہو گئی ہے۔
ذرائع کے مطابق خصوصی کاغذ کی کمی کے باعث مزید کسی حلقے کے دوبارہ بیلیٹ پیپرز کی چھپائی ممکن نہیں ہوسکے گی، سپریم کورٹ نے کسی بھی حلقے میں دوبارہ بیلیٹ پیپرز چھاپنے کا کہا تو متعلقہ حلقے میں الیکشن موخر کر دیا جائے گا۔
ذرائع کا مزید کہنا تھا کہ الیکشن کمیشن نے ضمنی انتخابات کے بیلیٹ پیپرز کی چھپائی کے لیے 200 ٹن کاغذ کی خریداری کے لیے آرڈر دے دیا ہے۔
قبل ازیں ترجمان الیکشن کمیشن نے کہا تھا کہ 2024 میں حصہ لینے والے امیدواروں کی کثیر تعداد کے پیش نظر لگ بھگ 2400 ٹن خصوصی سیکیورٹی کاغذ کی ضرورت پڑی تاہم کمیشن نے صورت حال کی سنگینی کے باعث بیلٹ پیپر کے سائز کو کم کرنے کا فیصلہ کیا جس سے خصوصی سیکیورٹی کاغذ کی ضرورت 2170 ٹن رہ گئی تھی۔
ترجمان نے کہا کہ یہ مقدار محض ایک دفعہ بیلٹ پیپر کی چھپائی کے لیے بمشکل کافی ہے۔
الیکشن کمیشن نے کہا تھا کہ اس صورت حال میں کچھ حلقوں میں بیلٹ پیپرز کی دوبارہ چھپائی کا بڑھتا ہوا سلسلہ اور اس مقصد کے لیے درکار خصوصی سیکیورٹی کاغذ کی اس مرحلہ پر بروقت دستیابی اور چھپائی ایک بڑا چیلنج بن کر سامنے آئی ہے۔
واضح رہے کہ ملک میں عام انتخابات 8 فروری 2024 کو شیڈول ہیں۔
لائیو ٹی وی