دل کی تکلیف پر لندن بھاگنے والوں نے عوام کو کچھ نہیں دیا، بلاول بھٹو
چیئرمین پاکستان پیپلز پارٹی بلاول بھٹو نے روایتی حریف مسلم لیگ (ن) پر تنقید کرتے ہوئے کہا کہ دل کی تکلیف پر لندن بھاگنے والوں نے عوام کو کچھ نہیں دیا۔
ڈان نیوز کے مطابق ورکرز کنونشن میں مسلم لیگ (ن) کے سابق صوبائی وزیر چوہدری عبدالغفور میو نے پیپلز پارٹی میں شمولیت کا اعلان کیا، اس دوران کنونشن سے خطاب کرتے ہوئے بلاول بھٹو کا کہنا تھا کہ پی پی پی حلقے سے جیتنے اور حکومت بنانے کے لیے انتخاب لڑرہی ہے، پیپلزپارٹی ڈٹ کر مقابلہ کرےگی ، کارکن گھر گھر جاکر عوام کو سمجھائیں، غریبوں کو حق دلانا ہے تو دیگر جماعتوں سے چھٹکارا پانا ہے۔
انہوں نے کہا کہ نفرت، تقسیم، گالم ،گلوچ کی سیاست پر یقین نہیں رکھتے، غریبوں کو حق دلانا ہے تو دیگر جماعتوں سے چھٹکارا پانا ہے، پیپلزپارٹی کا ایجنڈا پنجاب اور رائیونڈ کے عوام کو سمجھانا ہے۔
ان کا کہنا تھا کہ 300 یونٹ تک بجلی مفت چاہیے تو تیر کے نشان پر مہر لگائیں، ہم عبدالغفور مئیو اور ان کے ساتھیوں کو پارٹی میں خوش آمدید کہتے ہیں،ہم نے منشور پر الیکشن لڑنا ہے، قائد عوام اور شہید محترمہ بنیظیر بھٹو نے جو وعدے عوام سے کیے وہ پورے کیے ہیں۔
بلاول بھٹو نے کہا کہ آپ نے ہمارے دس نکاتی منشور کو رائیونڈ کی عوام تک پہنچانا ہے، ہم مسلم لیگ (ن) اور تحریک انصاف (پی ٹی آئی) کی طرح جھوٹے وعدے نہیں کرتے، ہوائی باتوں پر یقین نہیں رکھتے، پنجاب کے ہرضلع میں مفت اور معیاری علاج کی سہولت دیں گے، دل کی تکلیف پر لندن بھاگنے والوں نے عوام کو کچھ نہیں دیا۔
ان کا کہنا تھا کہ پی ٹی آئی حکومت نے 50 لاکھ گھر بنوانے کا وعدہ پورا نہیں کیا، عوام کے ساتھ پہلا وعدہ ہے کہ آپ کی آمدنی کو ڈبل کرنا چاہتے ہیں، ہم بے نظیر انکم سپورٹ پروگرام میں اضافہ کریں گے۔
وزیر اعظم کا لفظ بلاول بھٹو کے لیے بہت چھوٹا ہے، چوہدری عبدالغفور میو
مسلم لیگ (ن) کے سابق رہنما چوہدری عبدالغفور میو نے اس موقع پر کہا کہ آج بلاول بھٹو کی شکل میں ہمارے گھر میں ذوالفقار علی بھٹو آئے ہیں، وزیر اعظم کا لفظ بلاول بھٹو کے لیے بہت چھوٹا ہے، ایٹم بم کے اصل وارث لاہور میں آ چکے ہیں۔
ان کا کہنا تھا کہ عالمی ایجنٹوں سے جان چھڑانے کا وقت آ گیا ہے، اللہ کی قسم بلاول بھٹو پاکستان کی آخری امید ہیں، ہمارے پاس آخری موقع ہے، اسے ضائع نہیں کرنا، آج پاکستان کو شہید بی بی کا شہزادہ چاہیے جس پر کوئی الزام نہیں ہے، یہ سازشیں نہیں چلیں گی،اب یہ ختم ہوں گی۔
لائیو ٹی وی