حکومت کا سال نو پر پیٹرول اور ڈیزل کی قیمت برقرار رکھنے کا فیصلہ
حکومت نے سال نو کے موقع پر پیٹرولیم مصنوعات کی نئی قیمتوں کا اعلان کردیا ہے اور پیٹرول اور ڈیزل کی قیمتوں میں اضافہ نہ کرنے کا اعلان کیا گیا ہے۔
خزانہ ڈویژن سے جاری بیان میں کہا گیا کہ حکومت پاکستان نے آئل اینڈ گیس ریگیولیٹری اتھارٹی (اوگرا) کی سفارش پر پیٹرولیم مصنوعات کی قیمتوں میں 16 دسمبر 2023 سے ردوبدل کا فیصلہ کیا ہے۔
نگران وزیر اعظم انوار الحق کاکڑ نے پیٹرول اور ڈیزل کی قیمت برقرار رکھنے کی منظوری دے دی ہے۔
حکومت نے پیٹرول اور ڈیزل کی قیمتیں برقرار رکھنے کا فیصلہ کیا ہے جس کے تحت ڈیزل کی فی لیٹر قیمت 276 روپے 21 پیسے اور پیٹرول کی فی لیٹر قیمت 267 روپے 34 پیسے رہے گی۔
نوٹیفکیشن کے مطابق مٹی کا تیل دو روپے 19پیسے فی لیٹر سستا کرنے کی منظوری دی گئی ہے جس کے بعد مٹی کے تیل کی نئی قیمت 193 روپے 21 پیسے ہو گئی ہے۔
لائٹ ڈیزل کی فی لیٹرقیمت میں ایک روپے 11پیسے کا اضافہ کیا گیا ہے جس کے بعد لائٹ ڈیزل 165 روپے 75 پیسے میں دستیاب ہو گا۔
اس سے قبل 15 دسمبر کو نگران حکومت نے نگران وفاقی حکومت نے پیٹرولیم مصنوعات کی قیمتوں میں 14 روپے فی لیٹر تک کمی کا اعلان کیا تھا۔
حکومت نے پیٹرول کی فی لیٹر قیمت میں 14 روپے اور ہائی اسپیڈ ڈیزل کی قیمت میں 13 روپے 50 پیسے فی لیٹر کمی کا اعلان کیا تھا۔
پیٹرولیم مصنوعات کی قیمتوں میں کمی کا یہ فیصلہ عالمی سطح پر ڈیزل اور پیٹرول کی قیمتوں میں تقریباً 5 فیصد کی کمی کے پیش نظر کیا گیا تھا جبکہ ڈالر کے مقابلے میں روپے کی قدر میں بھی معمولی اضافہ ہوا تھا۔
لائیو ٹی وی