پاکستان کا دورہ آسٹریلیا: ٹیم منیجمنٹ نے کھلاڑیوں پر سختیاں بڑھا دیں
پاکستان کرکٹ بورڈ (پی سی بی) کی ٹیم منیجمنٹ نے کھلاڑیوں پر دورہ آسٹریلیا میں سختیاں بڑھا دیں۔
ڈان نیوز نے پی سی بی ذرائع کے حوالے سے بتایا کہ ٹیم ڈائریکٹر محمد حفیظ کی جانب سے کھلاڑیوں کے لیے نئے ایس او پیز واضح کر دیے گئے ہیں۔
محمد حفیظ نے کھلاڑیوں کو خلاف ورزی کرنے پر جرمانے کا اعلان بھی کیا ہے۔
ذرائع کا کہنا ہے کہ محمد حفیظ نے کھلاڑیوں کو وارننگ دی ہے کہ جو بھی کھلاڑی مجھے گراؤنڈ میں سویا ہوا دکھائی دیا یا وہ چست دکھائی نہ دیا تو اسے جرمانہ ہوگا۔
ٹیم ڈائریکٹر نے کھلاڑیوں پر واضح کردیا کہ وہ اپنی نیند پوری کریں کیونکہ جو بھی کھلاڑی سویا ہوا دکھائی دیا یا ٹیم سے بکھرا ہوا دکھائی دیا اس کو 500 ڈالر جرمانہ ہوگا۔
پاکستانی کرکٹ ٹیم ان دنوں دورہ آسٹریلیا پر ہے جہاں وہ کینگروز کے خلاف تین ٹیسٹ میچوں پر مشتمل سیریز کا دوسرا ٹیسٹ کھیل رہی ہے۔
قومی ٹیم کو پہلے ٹیسٹ میچ میں بدترین شکست کا سامنا کرنا پڑا تھا۔ پرتھ میں کھیلے جانے والے سیریز کے پہلے ٹیسٹ میچ میں آسٹریلیا نے پاکستان کو 360 رنز کے بڑے مارجن سے شکست دی تھی۔
لائیو ٹی وی