ساحلی علاقوں کے شاندار پکوانوں میں شامل مزیدار ’جھینگا مسالا‘
اگر سی فوڈ (sea-food) کھانے کے شوقین ہیں تو یہ ترکیب آپ ہی کے لیے ہے، کیونکہ آج ہم نفیس، مسالے دار اور لذیذ ڈش تیار کرنے والے ہیں جو جھینگے کے قدرتی ذائقے کو مزید تیکھا اور مزیدار بنا دے گی۔
بہت کم لوگوں کو جھینگا کھانا پسند ہوتا ہے لیکن اس کا ہرگز یہ مطلب نہیں کہ جھینگے کا ذائقہ مزیدار نہیں ہوتا، جھینگا کڑاہی، جھینگا رول، جھینگے کا باربی کیو اور جھینگا کٹاکٹ اور اس کے علاوہ کیکڑے کا سوپ اور کیکڑا باربی کیو بھی پاکستان میں شوق سے کھایا جاتا ہے بلکہ پاکستان میں اس کی ’سب سے بڑی‘ سی فوڈ مارکیٹ بھی موجود ہے۔
اس لیے آج ہم جھینگا مسالا بنانے جارہے ہیں جسے ایک بار گھر میں ضرور آزمائیں اور اس کا ذائقہ چکھیں۔
اجزا
جھینگے مسالا کے اجزا:
جھینگے ایک کلو یا 500 گرام
مسالا پیسٹ کے لیے:
زیرہ 1 چمچ
پیاز، موٹی سلائسیں کی ہوئیں- 200 گرام
ادرک، کٹا ہوا- 1 انچ کا ٹکڑا
لہسن - 7-8 (8 گرام)
ہری مرچیں- 3 سے 4 دو حصوں میں کاٹ لیں۔
2 چھوٹے ٹماٹر، موٹے کٹے ہوئے - 100 گرام
ہلدی پاؤڈر - 1/2 چائے کا چمچ
لال مرچ پاؤڈر - 2 چمچ
کشمیری مرچ پاؤڈر - 1.5 چائے کا چمچ
دھنیا پاؤڈر - 3 چمچ
زیرہ پاؤڈر - 1 چمچ
گرم مسالہ پاؤڈر - 1 چائے کا چمچ
تیل - 4.5 چمچ
نمک - 1.5 چمچ
دھنیا کے پتے، باریک کٹے ہوئے - 2 کھانے کے چمچ
جھینگے پکانے سے قبل مسالہ پیسٹ بنانے کی تیاری
سب سے پہلے جھینگوں کے چھلکے نکالیں اور پانی سے صاف کریں، مسالہ پیسٹ بنانے کے لیے پیاز اور ٹماٹر کے موٹے سلائسز بنائیں، ادرک اور لہسن کو چھیل کر ادرک کو کاٹ لیں، ہری مرچیں کاٹ لیں۔
اب ایک پین میں 1.5 کھانے کا چمچ تیل گرم کریں اور اس میں زیرہ ڈال دیں اور پھر پیاز کے ٹکڑے ڈال دیں، درمیانی آنچ پر 3 منٹ تک بھونیں یہاں تک کہ پیاز براؤن ہو جائے۔
اب اس میں ادرک، لہسن اور ہری مرچ ڈال کر مکس کریں اور درمیانی آنچ پر 2 منٹ تک بھونیں۔
آخر میں ٹماٹر کے ٹکڑے ڈالیں، مکس کریں اور درمیانی آنچ پر 3 منٹ تک بھونتے رہیں یہاں تک کہ ٹماٹر نرم ہوجائیں، اب انہیں ایک پلیٹ میں ایک طرف رکھ دیں اور ٹھنڈا ہونے دیں۔
ٹھنڈا ہونے کے بعد مکسچر کو بلینڈر میں ڈالیں اور 2 چمچ پانی ڈالنے کے بعد بلینڈ کریں۔
اب دھنیا کے پتوں کو باریک کاٹ کر ایک طرف رکھ دیں۔
ترکیب:
سب سے پہلے کڑاہی میں تیل گرم کریں اب اوپر جو ہم نے مسالہ پیسٹ بنایا تھا اسے کڑاہی میں ڈالیں اور درمیانی آنچ پر 3 منٹ تک بھونیں۔
گرم مسالہ پاؤڈر اور 1/2 چائے کا چمچ نمک کے علاوہ باقی تمام مسالے پاؤڈر ڈال کر مکس کریں اور جب بھی ضرورت ہو پانی کے چھینٹے ڈال کر مزید 5 منٹ تک درمیانی آنچ پر بھونیں، تیل الگ ہونے تک اسے بھونتے رہیں۔
اب جھینگے، گرم مسالہ پاؤڈر اور 1 چائے کا چمچ نمک ڈال کر مکس کریں اور درمیانی آنچ پر 3 منٹ تک بھونیں۔
200 ملی لیٹر پانی ڈال کر دوبارہ مکس کریں اور ڈھک کر ہلکی آنچ پر 7 منٹ تک پکائیں جب تک جھینگے اور گریوی پک نہ جائے اور تیل الگ نہ ہو جائے۔
باریک کٹے ہوئے دھنیا کے پتوں سے گارنش کریں اور سرو کریں۔
اس ترکیب کی ویڈیو دیکھنے کے لیے یہاں کلک کریں
لائیو ٹی وی