پاکستان میں کرکٹ کھیلنا بہت خاص ہوگا، کپتان نیوزی لینڈ کرکٹ ٹیم
نیوزی لینڈ کرکٹ ٹیم کے کپتان کین ولیمسن نے رواں برس شیڈول دورہ پاکستان کے حوالے سے کہا ہے کہ پاکستان میں جا کر کرکٹ کھیلنا بہت خاص ہوگا۔
پاکستان کرکٹ بورڈ (پی سی بی) کے ٹوئٹر پر جاری ویڈیو بیان میں کین ولیمسن کا کہنا تھا کہ پاکستان میں جا کر کرکٹ کھیلنا بہت دلچسپ ہوگا، پاکستان میں کرکٹ کی وسیع تاریخ ہے، جہاں چند ناقابل یقین میچز کھیلے گئے، ہم یقیناً اس کا مشاہدہ کرنے کے لیے بے چین ہیں۔
انہوں نے کہا کہ پاکستان کی ٹیم کافی عرصے سے تمام فارمیٹس میں بہترین کارکردگی کا مظاہرہ کر رہی ہے، ہم پاکستان کے دورے کو چیلنج کے طور پر دیکھتے ہیں، پاکستان کی ٹیم متوازن ہے، پاکستان کے پاس دنیا کے بہترین فاسٹ باؤلرز ہیں۔
یہ بھی پڑھیں: نیوزی لینڈ کرکٹ ٹیم کے دورۂ پاکستان کا شیڈول جاری
نیوزی لینڈ کے کپتان کین ولیمسن کا مزید کہنا تھا کہ پاکستان کی بیٹنگ کا دارومدار بابر اعظم پر ہے جو دنیا کے نمبر ایک بلے باز ہیں، پاکستان میں جا کر کھیلنا بہت خاص ہوگا۔
انہوں نے کہا کہ پاکستان کے لوگ بڑے پُر جوش ہیں کہ ان کے شہروں میں کرکٹ کھیلی جائے، ہمیں اس کا حصہ بننے پر خوشی ہوگی۔
خیال رہے کہ نیوزی لینڈ کرکٹ ٹیم دورۂ پاکستان میں 2 ٹیسٹ، 8 ون ڈے اور 5 ٹی20 انٹرنیشنل میچز کھیلے گی۔
پی سی بی کی جانب سے جاری کردہ شیڈول کے مطابق مہمان ٹیم دورہ پاکستان کے لیے 2 مختلف مراحل میں پاکستان آئے گی۔
شیڈول کے مطابق دورے کے پہلے مرحلے میں 27 دسمبر سے 15 جنوری تک دونوں ٹیمیں 2 ٹیسٹ اور 3 ون ڈے انٹرنیشنل میچز میں آمنے سامنے ہوں گی۔
سیریز کا پہلا ٹیسٹ میچ 27 سے 31 دسمبر تک کراچی میں کھیلا جائے گا، جبکہ دوسرا ٹیسٹ میچ 4 جنوری سے 8 جنوری تک ملتان میں ہوگا۔
مزید پڑھیں: رضوان ماہ ستمبر کے لیے آئی سی سی کے بہترین کھلاڑی قرار
اس دورے میں شامل 3 ون ڈے انٹرنیشنل میچز بالترتیب 11، 13 اور 15 جنوری کو کراچی میں کھیلے جائیں گے۔
نیوزی لینڈ کی کرکٹ ٹیم گزشتہ برس بھی پاکستان آئی تھی تاہم سیکیورٹی خدشات کے باعث دورہ ادھورا چھوڑ واپس چلی گئی تھی اور اس کے بعد انگلینڈ کی ٹیم نے بھی شیڈول دورہ منسوخ کردیا تھا تاہم بعد میں انگلینڈ نے دورے کی حانمی بھری تھی۔
واضح رہے کہ گزشتہ ماہ انگلینڈ کی کرکٹ ٹیم جوز بٹلر کی قیادت میں ٹی20 سیریز کے لیے پاکستان آئی تھی جو 2005 کے بعد انگلش ٹیم کا پہلا دورہ تھا، 19 رکنی انگلش ٹیم 7 میچوں کی ٹی20 سیریز کھیلنے کے لیے پاکستان آئی تھی جہاں اس نے سیریز میں 3-4 سے کامیابی حاصل کی تھی۔
یاد رہے کہ انگلینڈ کرکٹ ٹیم کے تاریخی دورے سے قبل آسٹریلیا کی کرکٹ ٹیم بھی 24 سال بعد مارچ میں پاکستان آئی تھی جہاں اس نے 3 ٹیسٹ، 3 ون ڈے اور ایک ٹی ٹوئنٹی میچ کھیلا تھا۔
لائیو ٹی وی