پی ٹی آئی کے سابق صوبائی وزیر سمیت دو اراکین اسمبلی کا پارٹی چھوڑنے کا فیصلہ
پاکستان تحریک انصاف (پی ٹی آئی) کے سابق صوبائی وزیر قانون سمیت دو اراکین خیبرپختونخوا اسمبلی نے پارٹی سے علیحدگی کا فیصلہ کرلیا اور صوبائی وزیرخزانہ نے تصدیق کردی۔
خیبرپختونخوا کے وزیرخزانہ تیمور سلیم جھگڑا نے تصدیق کی کہ اراکین صوبائی محمد فہیم اور سلطان خان پی ٹی آئی چھوڑ رہےہیں۔
مزید پڑھیں: ویڈیو اسکینڈل: وزیر قانون خیبر پختونخوا اپنے عہدے سے مستعفی
انہوں نے کہا کہ ہر سیاست دان اپنے مستقبل اور پسند کے مطابق کسی بھی سیاسی جماعت میں شامل ہوسکتا ہے۔
تیمور جھگڑا نے کہا کہ ‘ہم جانتے ہیں کہ رکن صوبائی اسمبلی محمد فہیم کافی عرصہ پہلے پارٹی چھوڑ چکے ہیں اور ان کا موجودہ بیان سمجھ سے بالاتر ہے’۔
پی ٹی آئی کے چارسدہ سے منتخب رکن صوبائی اسمبلی اور سابق وزیرقانون سلطان محمد خان نے پارٹی سے علیحدگی کی تصدیق کرتے ہوئے کہا کہ انہوں نے عوامی نیشنل پارٹی (اے این پی) میں شمولیت کا فیصلہ کرلیا ہے۔
انہوں نے کہا کہ میں نے اے این میں شامل ہونے کا فیصلہ کرلیا ہے اور کل اس کا اعلان کروں گا۔
سلطان محمد خان نے کہا کہ خاندان اور اپنے حامیوں سےطویل مشاورت کے بعد یہ فیصلہ کر لیا ہے اور باقاعدہ طور پر اے این پی میں شامل ہوجاؤں گا۔
یہ بھی پڑھیں: پی ٹی آئی اراکین قومی اسمبلی کے استعفوں کی مرحلہ وار منظوری کے خلاف درخواست سماعت کیلئے مقرر
پی ٹی آئی سے علیحدگی سے متعلق سوال پر انہوں نے کہا کہ اس حوالے سے تفصیلات پریس کانفرنس میں بتادوں گا۔
خیال رہے کہ سلطان محمد خان پی ٹی آئی کی موجودہ صوبائی حکومت میں بھی کابینہ کا حصہ تھے لیکن انہیں ہارس ٹریڈنگ کے حوالے سے ویڈیو اسکینڈل میں ہٹادیا گیا تھا۔
دوسری جانب اے این پی کی جانب سے بھی پیش رفت کی تصدیق کرتےہوئے کہا گیا کہ پی ٹی آئی اراکین اپنے خاندان اور حامیوں کے ساتھ باقاعدہ طور پر اے این پی میں شامل ہوں گے۔
اے این پی کی ترجمان ثمر ہارون بلور نے بیان میں کہا کہ سلطان محمد خان ضلع چارسدہ میں اپنی رہائش گاہ پر پریس کانفرنس میں صوبائی صدر ایمل ولی خان کی موجودگی میں اپنے فیصلے کا اعلان کریں گے۔
اس سے قبل ایمل ولی خان نے سلطان خان سے ان کی رہائش گاہ میں ملاقات کی تھی جہاں ان کے خاندان کے زعما بھی موجود تھے۔
پی ٹی آئی کے ایک اور رکن صوبائی اسمبلی محمد فہیم خان بھی اپنی پارٹی کی حکومت کھلے عام تنقید کرتے رہے ہیں اور الزام عائد کیا کہ کابینہ اراکین کرپشن میں مصروف ہیں۔
فہیم خان نے کہا کہ عمران خان اپنے ایجنڈے میں مصروف ہیں اور کرپشن کے حوالے سے کوئی توجہ نہیں دے رہے ہیں۔
مزید پڑھیں: ووٹوں کی خرید و فروخت کی متنازع ویڈیو: '3 رکنی تحقیقاتی کمیٹی تشکیل دے دی'
پی ٹی آئی کے صوبائی وزیرخزانہ تیمورجھگڑا نے سابق صوبائی وزیر قانون سلطان خان کے حوالے سے بات کرتے ہوئے کہا کہ وہ باصلاحیت اور تجربہ کار سیاست دان ہیں۔
انہوں نے کہا کہ سلطان خان پر لگنے والے الزامات سے سب واقف ہیں اور اے این پی نے ان الزامات کے حوالے سے کیا کہا تھا۔
تیمور جھگڑا نے کہا کہ اس طرح کسی کے چھوڑ جانے سے پارٹی اور عمران خان کی جدوجہد پر کوئی اثر نہیں پڑے گا۔
‘ہارس ٹریڈنگ’ ویڈیو
سلطان محمد خان نے گزشتہ برس فروری میں صوبائی وزارت سے استعفیٰ دیا تھا، جس کے فوری بعد وزیراعلیٰ نے ٹوئٹ میں کہا تھا کہ سوشل میڈیا پر گردش کرنے والی ‘مبینہ ویڈیو میں نظر آنے’ پر انہیں استعفیٰ دینے کے لیے کہا گیا تھا۔
پی ٹی آئی کی جانب سے ٹوئٹر پر مذکورہ ویڈیو بھی جاری کردی گئی تھی، جس میں چند اراکین اسمبلی کو پیسے گنتے ہوئے دکھایا گیا تھا، جو اطلاعات کے مطابق 2018 کے سینیٹ انتخابات سے متعلق تھے۔
وزیراعلیٰ خیبرپختونخوا محمود خان کی جانب سے ٹوئٹر پر جاری سلطان محمد خان کا استعفیٰ بھی دیا گیا، جس میں انہوں نے لکھا تھا کہ یہ ان کی اخلاقی ذمہ داری ہے کہ وہ کابینہ سے الگ ہوں اور میں مستعفی ہو رہا ہوں۔
انہوں نے لکھا تھا کہ انصاف کیاجائے گا تاکہ وہ اس معاملے میں اپنی صفائی دے سکیں۔