فلپائن میں شدید زلزلے کے نتیجے میں 4 افراد ہلاک
شمالی فلپائن میں شدید زلزلے کے نتیجے میں 4 افراد ہلاک اور 60 زخمی ہوگئے۔
خبر رساں ایجنسی 'رائٹرز' کے مطابق وزیر داخلہ بنجمن ابالوس نے ٹیلی ویژن پر نشر ہونے والی نیوز کانفرنس میں بتایا کہ دو افراد بینگویٹ صوبے میں جبکہ ایک صوبہ ابرا اور ایک دوسرے صوبے میں ہلاک ہوا۔
مزید پڑھیں: فلپائن میں طوفان، دس ہزار ہلاکتوں کا خدشہ
امریکی جیولوجیکل سروے کے اعداد و شمار کے مطابق زلزلہ ڈولورس قصبے سے 11 کلومیٹر جنوب مشرق میں 10 کلومیٹر کی گہرائی میں آیا۔
صدر فرڈینینڈ مارکوس جونیئر نے فیس بک پر کہا کہ زلزلے سے ہونے والے نقصانات کے بارے میں افسوسناک اطلاعات کے باوجود ہم ضرورت مندوں اور اس آفت سے متاثر ہونے والوں کو فوری امداد کی فراہمی یقینی بنانے کی کوشش کر رہے ہیں۔
زلزلہ مارکوس خاندان کے سیاسی گڑھ کے قریب آیا۔
ریاستی زلزلہ پیما ایجنسی کے ڈائریکٹر ریناٹو سولیڈم نے ڈی زیڈ آر ایچ ریڈیو اسٹیشن کو بتایا کہ شدید آفٹر شاکس متوقع ہیں۔
رینٹو نے کہا کہ زلزلے کا مرکز ابرا اور قریبی صوبوں کے پاس تھا اور یہ ایک بڑا زلزلہ ہے۔
یہ بھی پڑھیں: فلپائن میں طوفان ’رائے‘ کی تباہ کاریاں، ہلاکتیں 400 سے تجاوز کر گئیں
ابالوس نے بتایا کہ ابرا صوبے میں 173 عمارتوں کو نقصان پہنچا اور 58 مقامات پر لینڈ سلائیڈنگ کی اطلاع ملی، جس میں 60 میں سے 44 زخمی ہوئے۔
حکام نے بتایا کہ عمارت کے جزوی طور پر منہدم ہونے کے بعد ابرا صوبے میں ایک ہسپتال کو خالی کرا لیا گیا ہے لیکن وہاں کسی جانی نقصان کی اطلاع نہیں ملی۔
ابرا کے نائب گورنر جوئے برنوس نے اپنے فیس بک اکاؤنٹ پر تباہ شدہ ابرا ہسپتال کی تصاویر پوسٹ کیں جس میں اس کے اگلے حصے میں ایک بڑا سوراخ دیکھا جاسکتا ہے۔
آفٹر شاکس
ڈھائی لاکھ آبادی پر مشتمل ابرا شمالی فلپائن کا ایک خشکی سے گھرا صوبہ ہے، اس کی گہری وادیاں اور ڈھلوان ناہموار پہاڑوں سے گھری ہوئی ہیں۔
فلپائن قدرتی آفات کا شکار رہتا ہے اور یہ زلزلے کے لحاظ سے فعال بحرالکاہل کے 'رنگ آف فائر' پر واقع ہے جو کہ آتش فشاں اور فالٹ لائنوں کا ایک بینڈ ہے جو بحرالکاہل کے کناروں پر محیط ہے، یہاں اکثر زلزلے آتے ہیں اور ہر سال اوسطاً 20 طوفان آتے ہیں جن میں سے کچھ جان لیوا لینڈ سلائیڈنگ کا باعث بنتے ہیں۔
شمال میں بھی ایلوکوس سور صوبے کے ایک کانگریس کے رکن ایرک سنگسن نے ڈی زی ایم ایم ریڈیو اسٹیشن کو بتایا کہ وہاں زلزلے کے جھٹکے شدت سے محسوس کیے گئے تھے اور یہ 30 سیکنڈ یا اس سے زیادہ تک جاری رہے۔
مزید پڑھیں: فلپائن کے جزائر میں زلزلہ، 8 افراد ہلاک
ایرک سنگسن نے کہا کہ مجھے لگا کہ میرا گھر گر جائے گا، اب ہم لوگوں تک پہنچنے کی کوشش کر رہے ہیں، ابھی آفٹر شاکس آ رہے ہیں اس لیے ہم اپنے گھر سے باہر ہیں۔
زلزلے نے لوزون کے مغربی ساحل پر واقع ویگن شہر میں تاریٰ ورثہ تصور کی جانے والی عمارات کو بھی نقصان پہنچایا جو اپنے پرانے ہسپانوی نوآبادیاتی فن تعمیر کے لیے جانی جاتی ہیں۔
سیاح ایڈیسن اڈوکول نے ریڈیو اسٹیشن کو بتایا کہ وہ ویگن میں بنٹے چرچ بیل ٹاور کی تصاویر لے رہے تھے جب زلزلہ آیا اور اس کی وجہ سے ٹاور تین منٹ تک ہلتا رہا۔
سینیٹر ایمی مارکوس نے کہا کہ کئی گرجا گھروں کو نقصان پہنچا ہے۔
زلزلے کے جھٹکے دارالحکومت منیلا میں بھی محسوس کیے گئے جہاں کئی عمارات کو خالی کرا لیا گیا ہے، کچھ لوگ ایک عمارت کی 30ویں منزل سے انخلا پر مجبور ہوگئے جبکہ شہر کے میٹرو ریل کے نظام کو رش کے اوقات میں روک دیا گیا ہے۔
لائیو ٹی وی