شوہر کے ساتھ چھٹیاں منانے کی تصاویر پر ندا یاسر کو تنقید کا سامنا
اداکارہ و میزبان ندا یاسر حال ہی میں چھٹیاں منانے شوہر اور بچوں کے ہمراہ امریکا روانہ ہوئیں تو انہوں نے سوشل میڈیا پر مداحوں کے لیے تصاویر بھی شیئر کیں۔
تاہم اداکارہ کو شوہر کے ہمراہ تصاویر شیئر کرنا مہنگا پڑ گیا اور لوگوں نے ان سمیت ان کے شوہر کو بھی شدید تنقید کا نشانہ بنایا۔
ندا یاسر نے 2 جولائی کو امریکا روانگی کے وقت یاسر نواز کے ہمراہ تصاویر شیئر کیں، جن میں انہیں مردانہ فیشن کی شرٹ میں دیکھا گیا۔
میزبان نے جینز پینٹ کے ساتھ ٹی شرٹ بھی پہن رکھی تھی مگر مکمل لباس پہننے کے باوجود مداحوں نے انہیں تنقید کا نشانہ بنایا اور ان کے شوہر کو بیوی کے طعنے دے کر غیرت دلانے کی کوشش کی۔
زیادہ تر لوگوں نے یاسر نواز کو مخاطب ہوتے ہوئے ان کی تصاویر پر کمنٹس کرتے ہوئے انہیں مشورہ دیا کہ وہ اہلیہ کی شرٹ کے بند کرکے غیرت کا ثبوت دیں۔
بعض لوگوں نے ان کی تصاویر پر کمنٹس کرتے ہوئے لکھا کہ غیرت مند انسان کی پہچان ان کی اہلیہ کے لباس سے ہوتی ہے۔
اسی طرح لوگوں نے ندا یاسر کو ’حیا‘ کا درس دیتے ہوئے ٹی شرٹ نہ پہننے کا مشورہ دیتے ہوئے سر پر دوپٹہ رکھنے کا بھی کہا۔
بعض افراد نے لکھا کہ اب دیگر اداکاراؤں کی طرح ندا یاسر کا لباس بھی مختصر اور بولڈ ہوتا جا رہا ہے۔
تاہم بہت سارے افراد نے ان کی تصاویر کی تعریف کرتے ہوئے انہیں سکون سے چھٹیاں گزارنے کا مشورہ بھی دیا اور کہا کہ وہ تنگ نظر افراد کے کمنٹس پر توجہ نہ دیں۔
تصاویر کے علاوہ ندا اور ان کے شوہر یاسر نے ولاگ کا ٹیزر بھی شیئر کیا اور بتایا کہ وہ جلد ہی امریکا میں چھٹیاں گزارنے کا مکمل ولاگ شیئر کریں گے۔
لائیو ٹی وی