بولی وڈ کی اسکینڈل کوئین کہلانے والی اداکارہ کنگنا رناوٹ نے دعویٰ کیا ہے کہ ان کے بہت سارے مسلمان دوست ’ناجائز‘ کام کرتے ہیں۔

انہوں نے مذکورہ دعویٰ حضور اکرم ﷺ کے بارے میں بھارتی جنتا پارٹی (بی جے پی) کے ارکان کے گستاخانہ ریمارکس کے بعد کیا۔

کچھ دن قبل بی جے پی رہنمائوں نے گستاخانہ کلمات کہے تھے، جس پر پوری دنیا میں بھارت کی مذمت کی گئی اور پاکستان کے وزارت خارجہ نے بھارتی ناظم الامور کو بھی وضاحت کے لیے طلب کیا تھا جب کہ وہاں کی سیاسی، سماجی و شوبز شخصیات نے بھی بی جے پی رہنماؤں کی مذمت کرتے ہوئے انہیں سزا دینے کا مطالبہ کیا تھا۔

تاہم کنگنا رناوٹ نے گستاخ رہنماؤں کے بیان کے بعد دعویٰ کیا ہے کہ ان کے بہت سارے مسلمان دوست غیر شرعی کام کرتے ہیں۔

شوبز ویب سائٹ ’بولی وڈ لائف‘ کے مطابق کنگنا رناوٹ نے بی جی پی رہنماؤں کے بیان کے بعد انسٹاگرام پوسٹ کرتے ہوئے لکھا کہ ان کے بہت سارے مسلمان دوست ورک لوڈ ہونے سمیت دیگر وجوہات کی بنا پر کئی بار ’ناجائز‘ کام کرتے ہیں، وہ حلال سے متعلق مذہبی احکامات کو نظر انداز کر دیتے ہیں۔

انہوں نے دعویٰ کیا کہ ان کی بہت ساری مسلمان دوست شراب نوشی کرنے کے ساتھ ساتھ شادی سے قبل جسمانی تعلقات استوار کرتے ہیں جب کہ وہ پردہ بھی نہیں کرتیں۔

یہ بھی پڑھیں: جعلی ویڈیو کو حقیقی سمجھنے پر کنگنا رناوٹ شہ سرخیوں کی زینت بن گئیں

انہوں نے الزام عائد کیا کہ ان کے بعض دوست حالات کے مطابق حرام جانوروں کا گوشت تک کھاتے ہیں اور وہ غلیظ زبان بھی استعمال کرتے ہیں، کیوں کہ یہی ان کے ملک بھارت کی خوبصورتی ہے۔

انہوں نے دلیل دی کہ آزادی اظہار ہی سب کچھ ہے اور اگر یہ میسر نہیں تو بی جے پی رہنما نوپور تو کیا سب لوگ جرائم پیشہ بن جائیں گے۔

کنگنا رناوٹ کی جانب سے ایسی پوسٹ کیے جانے کے بعد لوگوں نے انہیں تنقید کا نشانہ بنایا اور خود ہندو مذہب کے پیروکاروں نے بھی انہیں شرم دلوائی اور لکھا کہ کسی کے غلط اور گستاخانہ کام کو اچھا پیش کرنے سے گریز کرو۔

کنگنا رناوٹ کو عام طور پر بولی وڈ کی بد زبان اداکارہ اور اسکینڈل کوئین کے نام سے جانا جاتا ہے اور حکمران جماعت بی جے پی کی حمایتی بھی ہیں اور وہ کھل کر نریندر مودی کے حق میں بولتی دکھائی دیتی ہیں۔