بلوچستان حکومت نے گندم کی امدادی قیمت میں 200 روپے اضافہ کردیا
بلوچستان حکومت نے گندم کی خریداری کے لیے امدادی قیمت میں 200 روپے اضافے کی منظوری دیتے ہوئے نئی قیمت 2200 روپے فی 40 کلوگرام مقرر کردی۔
ڈان اخبار میں شائع رپورٹ کے مطابق بلوچستان حکومت نے محکمہ خوراک کو ہدایات دی ہیں کہ صوبے کو گندم کے بحران سے بچانے کے لیے ہنگامی بنیادوں پر گندم کی خریداری شروع کی جائے۔
مزید پڑھیں: گندم سے ’روبیلا‘ وائرس پھیلنے کا خدشہ، ترکی نے بھارت کی گندم واپس کردی
وزیر اعلیٰ بلوچستان میر عبدالقدوس بزنجو کی زیر صدارت کابینہ کا اجلاس ہوا جس میں 50 نکاتی ایجنڈے پر تبادلہ خیال کیا گیا اور ان میں سے 45 نکات کی منظوری دی گئی جبکہ دیگر نکات آنے والے اجلاس میں منظور کیے جائیں گے۔
اجلاس کے بعد سینئر وزیر سردار عبدالرحمٰن کھیتران اور اطلاعات و سماجی بہبود کی پارلیمانی سیکریٹری بشریٰ رند نے میڈیا سے گفتگو کرتے ہوئے کہا کہ کابینہ نے یہ فیصلہ کیا ہے کہ بغیر کسی مشکلات کے صوبے کے عوام کو گندم اور آٹا فراہم کرنے کے لیے تمام ممکن کوششیں کی جائیں گی۔
انہوں نے کہا کہ کابینہ نے یہ فیصلہ بھی کیا ہے کہ گندم کے ذخیرہ اندوزوں کے خلاف کارروائی کرکے غیر قانونی اسٹاک بھی ضبط کیا جائے گا۔
یہ بھی پڑھیں: اقتصادی رابطہ کمیٹی نے 30 لاکھ ٹن گندم درآمد کرنے کی منظوری دے دی
ان کا کہنا تھا کہ کابینہ نے ربیع اور خریف کی فصلوں کے لیے کھاد پر سبسڈی کی بھی منظوری دی ہے۔
انہوں نے مزید کہا کہ اس وقت ملک کو درپیش مشکل معاشی حالات کے پیش نظر کفایت شعاری مہم کے طور پر صوبائی وزرا کو ایندھن کوٹہ اور دیگر اخراجات سمیت تمام سہولیات میں 50 فیصد کمی کا فیصلہ کیا گیا ہے۔
وزرا نے کہا کہ بلوچستان میں تین نئے اضلاع حب، کریزات اور اوستہ محمد کے قیام کا بھی فیصلہ کیا گیا ہے۔
لائیو ٹی وی