ارجنٹینا میں پاکستانی سفارت خانے کا انسٹاگرام اکاؤنٹ ہیک
جنوبی امریکی ملک ارجنٹینا میں پاکستانی سفارت خانے کا انسٹاگرام اکاؤنٹ ہیک کرکے اس پر پوسٹس شیئر کردی گئیں۔
ارجنٹینا میں پاکستانی سفارت خانے کے انسٹاگرام اکاؤنٹ سے قبل رواں ماہ 3 دسمبر کو یورپی ملک سربیا میں پاکستانی سفارتخانے کے سوشل میڈیا اکاؤنٹس بھی ہیک کیے گئے تھے۔
ارجنٹینا میں موجود پاکستانی سفارتخانے کے ٹوئٹر اور انسٹاگرام پر 21 دسمبر کو بتایا گیا کہ ایمبیسی کا آفیشل انسٹاگرام اکاؤنٹ ہیک کرلیا گیا تھا، جس کا دوبارہ کنٹرول حاصل کرلیا گیا۔
سفارتخانے نے بعد ازاں انسٹاگرام پر کی گئی پوسٹ میں بھی اس بات کی تصدیق کی تھی کہ ایمبیسی کا اکاؤنٹ ہیک کرکے اس پر کچھ پوسٹس کی گئی تھیں۔
یہ بھی پڑھیں: سربیا میں پاکستانی سفارتخانے کے سوشل میڈیا اکاؤنٹس ہیک
سفارتخانے نے واضح نہیں کیا کہ ہیک کیے جانے کے بعد کس طرح کی پوسٹس کی گئی تھیں، تاہم بتایا گیا کہ ایک گھنٹے کے دوران ہیک ہونے والے اکاؤنٹ پر کی گئی پوسٹس یا وہاں سے دوسروں کو بھیجے گئے میسیجز کو پاکستانی سفارتخانے کی جانب سے نہ سمجھا جائے۔
ارجنٹینا کے سفارتخانے کے انسٹاگرام ہیک ہونے سے متعلق وزارت خارجہ کی جانب سے بھی ٹوئٹ کی گئی تھی۔
اس سے قبل رواں ماہ 3 دسمبر کو یورپی ملک سربیا میں موجود پاکستانی سفارتخانے کے سوشل میڈیا اکاؤنٹس کو بھی ہیک کیا گیا تھا۔
سربیا میں موجود سفارتخانے کے اکاؤنٹس کو ہیک کیے جانے کے بعد ٹوئٹر پر گلوکار و موسیقار سعد علوی کا وزیر اعظم عمران خان کے بیان ’آپ نے گھبرانا نہیں ہے‘ پر بنایا گیا کامیڈی پیروڈی گانا شیئر کیا گیا تھا۔
سربیا سفارتخانے کے ہیک کیے گئے ٹوئٹر اکاؤنٹ پر یہ بھی ٹوئٹ کی گئی تھی کہ مہنگائی بڑھتی جا رہی ہے، جس وجہ سے لوگوں کا گزارا کرنا مشکل ہوگیا ہے۔
ساتھ ہی یہ ٹوئٹ میں دعویٰ کیا گیا تھا کہ سفارت خانے کے عملے کو تین ماہ سے تنخواہ نہیں مل سکی، جس وجہ سے وہ بچوں کی اسکول کی فیس بھی ادا نہیں کر سکے۔
تاہم بعد ازاں سربیا سفارتخانے کے تمام سوشل میڈیا اکاؤنٹ پر بھی کنٹرول حاصل کرلیا گیا تھا۔
لائیو ٹی وی