وزیراعظم 10دسمبر کو گرین لائن منصوبے کا افتتاح کریں گے، اسد عمر

ویب ڈیسک شائع December 5, 2021

وفاقی وزیر منصوبہ بندی اسد عمر نے کہا کہ کراچی میں پہلا جدید ٹرانسپورٹ نظام گرین لائن بی آر ٹی شروع کیا جا رہا ہے— فائل فوٹو: ڈان نیوز

وفاقی وزیر برائے منصوبہ بندی اسد عمر نے کہا ہے کہ وزیراعظم رواں ماہ 10دسمبر کو کراچی کے گرین لائن منصوبے کا افتتاح کریں گے۔

وفاقی وزیر برائے منصوبہ بندی نے اتوار کو سماجی راطوں کی ویب سائٹ ٹوئٹر پر اپنے پیغام میں کہا کہ کراچی میں پہلا جدید ٹرانسپورٹ نظام گرین لائن بی آر ٹی شروع کیا جا رہا ہے جس کا افتتاح 10دسمبر کو وزیر اعظم عمران خان کریں گے۔

واضح رہے کہ وزیر منصوبہ بندی کا یہ بیان ایک ایسے موقع پر آیا ہے کہ جب گزشتہ ہفتے ہی انہوں نے کہا تھا کہ گرین لائن منصوبہ 25دسمبر سے کمرشل بنیاد پر فعال ہو گا۔

انہوں نے کہا تھا کہ اگلے دس دن میں یہ منصوبہ ٹرائل آپریشن کے لیے تیار ہو گا، اس کے بعد وزیراعظم عمران خان کراچی آ کر منصوبے کا افتتاح کریں گے، تقریباً دو ہفتے ٹرائل آپریشن کے بعد 25 دسمبر کو کمرشل آپریشن کا آغاز کر دیا جائے گا۔

یاد رہے کہ کراچی میں وفاقی حکومت کے 16.85 ارب روپے کے بس منصوبے کا سنگ بنیاد سابق وزیراعظم نواز شریف نے فروری 2016 میں رکھا تھا۔

جس کے بعد منصوبے کو مزید وسیع کرتےہوئے 10 کلومیٹر کا اضافہ کردیا گیا تھا اور لاگت کا تخمینہ 24 ارب روپے تک لگایا گیا تھا۔

یہ بھی پڑھیں: ‘گرین لائن بس اور کے4 منصوبہ مسلم لیگ(ن) نے شروع کیا’

ابتدائی طور پر اس منصوبے کو 2017 کے آخر تک مکمل ہونا تھا لیکن نئی ڈیڈ لائنز دی جاتی رہیں، منصوبے کے آغاز سے روڈ کے دونوں اطراف رکاؤٹوں کے باعث شہریوں کو شدید مشکلات کا سامنا کرنا پڑ رہا ہے۔

اسی طرح دکانداروں اور کاروبار افراد کو بھی منصوبے میں تاخیر کے باعث مشکلات کا سامنا ہے۔

پاکستان تحریک انصاف (پی ٹی آئی) کی مرکز میں حکومت آنے کے بعد یہ منصوبے طوالت اختیار کرگیا تھا تاہم گزشتہ ماہ 24 اکتوبر کو گرین لائن منصوبے کی 40 بسوں کی دوسری اور آخری کھیپ کراچی پہنچ گئی تھی۔

حکام کی طرف سے بتایا گیا کہ کراچی کے شہریوں کے لیے بس ریپڈ ٹرانزٹ سسٹم (بی آر ٹی ایس) کے تحت 80 بسوں کے ساتھ اس منصوبے کا آغاز کیا جائے گا۔

ایک اندازے کے مطابق اس منصوبے سے روزانہ تقریباً 3 لاکھ شہری مستفید ہوں گے۔

گرین لائن منصوبے کی 40 بسوں کی پہلی کھیپ 19 ستمبر کو کراچی پہنچی تھی، جس کو وزیر منصوبہ بندی نے امید کی کرن اور ایک سنگ میل سے تعبیر کیا تھا۔

اسد عمر نے کہا تھا کہ کراچی والوں کے لیے 40 سال کے طویل دور کے بعد جدید سرکاری ٹرانسپورٹ کی سہولت کا آغاز ہوگا۔