کشمیریوں کے دل ہمارے ساتھ دھڑکتے ہیں، صدر مملکت
صدر مملکت عارف علوی نے کہا ہے کہ کشمیریوں کے دل ہمارے ساتھ دھڑکتے ہیں، جب کرکٹ میچ پر وہ ہماری خوشیوں میں شریک ہوتے ہیں تو ان پر مقدمے کیے جاتے ہیں، بھارتی حکومت شرم کرو۔
27 اکتوبر 1947 کو بھارت کے کشمیر پر غیر قانونی قبضے کی یاد میں یومِ سیاہ کے موقع پر صدر مملکت نے اسلام آباد میں اسپیکر قومی اسمبلی اسد قیصر اور اہم حکومتی شخصیات کے ہمراہ کشمیر ریلی میں شرکت کی۔
اس موقع پر میڈیا سے گفتگو کرتے ہوئے ڈاکٹر عارف علوی نے کہا کہ بہت بڑی بات ہے کہ ظلم کے ان اندھیروں میں بھی وہ پاکستان کے ساتھ اپنی محبت اور جذبات کی عکاسی کرتے ہیں۔
یہ بھی پڑھیں: کشمیر کی آزادی کا ہمارا اور سید علی گیلانی کا خواب بہت جلد پورا ہوگا، صدر عارف علوی
انہوں نے کہا کہ میرے خیال میں جس جوش و جذبے سے اسلام آباد سمیت پاکستان کے دیگر شہروں میں خوشیاں منائی گئیں، سری نگر میں اس سے زیادہ جذبات سے جشن ہوا، کشمیری بار بار دنیا کو اس کا وعدہ یاد دلاتے ہیں جو پورا نہیں ہوا۔
ان کا کہنا تھا کہ مقبوضہ کشمیر میں پیلٹ گنز کی وجہ سے سیکڑوں افراد اپنی بینائی سے محروم ہوئے، خواتین کے ریپ کیے جاتے ہیں، لوگوں کو محصور رکھا جاتا ہے، کشمیری رہنماؤں کو جیل بھیج دیا جاتا ہے، برسوں نظر بند رکھا جاتا ہے۔
صدر نے کہا کہ ہم کشمیری بھائیوں سے کہنا چاہتے ہیں کہ پاکستان آپ کا ہے، آپ ہمارے ہیں، آپ ہمارے بھائی ہیں، جو ظلم و ستم کی کہانی چل رہی ہے اس پر پاکستان عالمی برادری کی توجہ مبذول کرانا چاہتا ہے کہ یہ تجارت کا معاملہ نہیں ہے، بھارت اگر جمہوریت کا دعویٰ کرتا ہے تو وہاں جمہوریت نہیں ہے، وہاں ظلم کی داستانیں رقم ہورہی ہیں۔
بات کو جاری رکھتے ہوئے انہوں نے کہا کہ کشمیری بھائیوں کے ساتھ جو ہورہا ہے اس کی عکاسی بھارت میں دیگر اقلیتوں خاص کر مسلمانوں کے ساتھ ہونے والے ظلم سے بھی ہوتی ہے۔
مزید پڑھیں: آخر کشمیر اہمیت کیوں رکھتا ہے؟
انہوں نے کہا کہ میں بھارتی حکومت کو خبردار کرتا ہوں کہ مودی نے جس طرح گجرات میں مسلمانوں کے خلاف ظلم کیا اور جس انداز میں مسلمانوں کے خلاف بھارت کے دیگر حصوں میں ظلم کا سلسلہ جاری ہے، کشمیری مقابلہ کریں گے، کشمیری چین سے نہیں بیٹھیں گے۔
ڈاکٹر عارف علوی کا کہنا تھا کہ بھارتی حکومت کشمیر میں آبادیاتی تناسب بدلنا چاہتی ہے جو ہم قبول نہیں کریں گے اور کشمیر میں انہیں ایسا کرنے نہیں دیا جائے گا۔
صدر مملکت نے کہا کہ یہ جو ظلم و ستم کی دستانیں اور دنیا کی کالی تاریخ کشمیریوں پر رقم کی گئی ہے، ہم پاکستانی ہر فورم پر آپ کا ساتھ دیں گے اور ہر جگہ آپ کا مقدمہ لڑ رہے ہیں۔
انہوں نے کشمیری خواتین کو مخاطب کرتے ہوئے کہا کہ میری بہنوں اور ماؤں فکر نہیں کرو انشا اللہ آپ کی آزادی قریب ہے، ہم بھارت کی اس غلط فہمی کو ختم کریں گے کہ کشمیر اٹوٹ انگ ہے۔
ان کا کہنا تھا کہ جس بنیاد پر ہندوستان کی تقسیم ہوئی ان اصولوں کے مطابق نہ صرف کشمیر بلکہ جونا گڑھ، حیدرآباد دکن، مناودر پاکستان کا حصہ ہونا چاہیے تھا، کتنی ہی ریاستیں ہیں جن پر بھارت نے قبضہ کیا۔
یہ بھی پڑھیں: دنیا کو تسلیم کرلینا چاہیے کہ بھارت ایک غیر ذمہ دار جوہری ملک ہے، صدر مملکت
صدر مملکت نے بھارتی وزیراعظم نریندر مودی کو مخاطب کرتے ہوئے کہا کہ خدا کا خوف کریں یہ ظلم بند کریں، کشمیر کو آزاد کریں۔
انہوں نے کہا کہ جب ظلم کے اندھیرے بڑھ جاتے ہیں تو اللہ کا نظام ہے کہ روشنی کی کرن پھوٹتی ہے اور بھارت ظلم کر کے اپنی ریاست کی قبر کھود رہا ہے۔
ڈاکٹر عارف علوی نے کہا کہ مقبوضہ کشمیر میں نسل کشی کی تیاری کی جارہی ہے، ہمیں خطرہ اس بات کا ہے کہ وہ وہاں ظلم کریں گے، جس کے خلاف عوام اٹھیں گے جس کا الزام وہ ہم پر لگائیں گے۔
انہوں نے بھارت ہندوتوا راج کے تحت خود اپنی تاریخ بھی مٹانا چاہتا ہے اور نئی تاریخ اس کی کالی ہے۔
صدر مملکت نے بھارت کو خبردار کیا کہ ظلم بند کردو ورنہ تم اندر سے ہی تباہ ہوجاؤ گے، ہم کشمیریوں کے ساتھ ہیں اور ان کی قربانیوں کو خراج تحسین پیش کرتے ہیں۔
لائیو ٹی وی