بیماری کے باعث 2 اکتوبر کی دوپہر کو مداحوں سے ہمیشہ کے لیے بچھڑ جانے والے لیجنڈری اداکار عمر شریف کی کامیڈی کے دیوانے صرف اپنے ملک نہیں بلکہ بیرون ممالک بھی تھے۔

کیریئر کے عروج کے دوران عمر شریف نے بھارت، برطانیہ، کینیڈا، امریکا اور متحدہ عرب امارات (یو اے ای) سمیت کئی ممالک میں فن کا مظاہرہ کیا اور متعدد تقریبات میں ان کے ساتھ بولی وڈ شخصیات کو بھی مدعو کیا جاتا تھا۔

عمر شریف نے اپنے فیس بک پیج پر وقتا بوقتا بولی وڈ شخصیات سے کی جانے والی ملاقاتوں کی تصاویر شیئر کی تھیں، جن سے اندازہ ہوتا ہے کہ کس قدر بھارتی فلمی ستارے لیجنڈی کامیڈین کے دیوانے تھے۔

عمر شریف نے سلمان خان، شاہ رخ خان، عامر خان، ییش چوپڑا، راکیش روشن، ارشد وارثی، سشمیتا سین، ریکھا اور شلپا شیٹی سمیت کئی شخصیات کے ساتھ ملاقاتیں کیں جو تاریخ کا حصہ بن گئیں

عمر شریف نے بھارتی دورے بھی کیے، جہاں ان سے خصوصی طور پر کئی شوبز شخصیات نے ملاقاتیں کیں، تاہم ان کی بولی وڈ شخصیات سے زیادہ تر امریکا، برطانیہ اور کینیڈا میں ملاقاتیں ہوئیں، جہاں وہ پرفارمنس کے لیے گئے ہوئے تھے۔

عمر شریف 19 اپریل 1955 کو کراچی کے علاقے لیاقت آباد میں پیدا ہوئے تھے۔

ان کا اصل نام محمد عمر تھا اور پیشہ ورانہ طور پر وہ عمر شریف کے نام سے جانے جاتے تھے اور اسی نام سے انہوں نے شہرت پائی۔

عمر شریف نے 14 برس کی عمر میں اپنے کیریئر کا آغاز ایک اسٹیج ڈرامے سے کیا اور طنز و مزاح کے منفرد انداز نے انہیں شہرت کی بلندیوں تک پہنچا تھا۔

انہوں نے برصغیر میں 1980 ، 1990 اور 2000 کی دہائی کے اوائل میں مقبولیت حاصل کی۔

انہوں نے اپنی کامیڈی سے کراچی کے ناظرین کی توجہ حاصل کی اور اپنے کیریئر کے سفر کا آغاز کیا جو 40 سال کے عرصے تک محیط رہا۔

گزرتے وقت کے ساتھ عمر شریف نے اپنے چٹکلوں اور مکالموں سے ملک بھر میں مقبولیت پائی۔

عمر شریف کو 1992 میں 'مسٹر 420' کے لیے بہترین اداکار اور ہدایت کار کے نیشنل ایوارڈز سے نوازا گیا تھا، انہوں نے10 نگار ایوارڈ حاصل کیے اور ایک ہی برس میں 4 نگار ایوارڈز حاصل کرنے کا اعزاز بھی پایا۔

اپنے فن کے ذریعے ملک کا نام روشن کرنے پر ان کی خدمات کے اعتراف میں حکومت پاکستان کی جانب سے عمر شریف کو تمغہ امتیاز سے بھی نوازا گیا تھا۔

تمام تصاویر : بشکریہ عمر شریف آفیشل فیس بک پیج