'وزیر اعظم نے دورہ سعودی عرب سے چاول کے تھیلوں کے علاوہ کیا کامیابی حاصل کی؟'
پاکستان پیپلز پارٹی (پی پی پی) کے چیئرمین بلاول بھٹو زرداری نے وزیر اعظم عمران خان کے حالیہ دورہ سعودی عرب پر شدید تنقید کرتے ہوئے اسے ناکام دورہ قرار دے دیا۔
بلاول ہاؤس کے میڈیا سیل سے جاری بیان میں بلاول بھٹو زرداری نے سوال کیا کہ دورہ سعودی عرب سے عمران خان نے زکوٰۃ اور فطرے کی مد میں چاول کے 19 ہزار تھیلوں کو حاصل کرنے کے علاوہ کیا کامیابی حاصل کی؟
انہوں نے مطالبہ کیا کہ وزیر اعظم کے دورہ سعودی عرب کے اخراجات کا زکوٰۃ کی مد میں حاصل ہونے والے چاولوں کے تھیلوں کی قیمت سے موازنہ کیا جائے۔
یہ بھی پڑھیں: سعودی عرب کے ساتھ رابطہ کونسل قائم کرنے سمیت 5 اہم معاہدوں پر دستخط
ان کا کہنا تھا کہ عمران خان کی 22 سالہ جدوجہد اگر ایک ایٹمی ملک کو سعودی بادشاہ کے زکوٰۃ کے چاول کے لائق بنانے کے لیے تھی تو خدا کسی کو ایسی جدوجہد کی توفیق نہ دے۔
بلاول بھٹو زرداری نے کہا کہ مرغی 400 روپے کلو سے زائد کرکے عمرے کے لیے سعودی عرب جانے والے عمران خان سے عوام حساب لیں گے۔
انہوں نے وزیر اعظم کو مخاطب کرتے ہوئے کہا کہ 'وزیر اعظم صاحب! نوٹس لینے اور انکوائری رپورٹس کے جھانسے دے کر مہنگائی پر قابو پانے کے آپ کے دعوے بے نقاب ہوچکے ہیں، نتھیا گلی میں عید کی چھٹیاں منانے والے وزیراعظم کو علم ہی نہیں کہ وہ ملک کے گلی کوچوں میں تبدیلی کے سونامی سے قیامت برپا کرچکے ہیں'۔
چیئرمین پیپلز پارٹی نے سوال اٹھایا کہ تنخواہ دار تو کچھ گزارا کر سکتے ہیں مگر عمران خان نے لاک ڈاؤن کے دوران عید میں دیہاڑی دار مزدوروں کے گزارے کے لیے کیا پالیسی بنائی ہے؟
مزید پڑھیں: پاکستان میں مافیاز پرانے نظام کو بچانا چاہتی ہیں، وزیراعظم
ان کا کہنا تھا کہ عمران خان غریبوں پر رحم کریں، صرف ایک سال میں بیکری کی اشیا کی قیمتوں میں 19 فیصد اضافہ ہوچکا ہے، پی ٹی آئی حکومت کے پاس ذخیرہ اندوزوں کو قابو کرنے کے لیے کوئی پالیسی ہی نہیں ہے کم از کم مزید مہنگائی سے تدارک کے لیے سرکاری قیمتوں کے ہی نفاذ کو یقینی بنالیں۔
خیال رہے کہ وزیر اعظم عمران خان نے 7 سے 9 مئی تک پاکستانی وفد کے ہمراہ 3 روزہ سرکاری دورہ کیا تھا، 2018 کے بعد سے وزیر اعظم عمران خان کا سعودی عرب کا یہ تیسرا سرکاری دورہ تھا۔
اپنے دورے کے دوران وزیر اعظم نے سعودی ولی عہد محمد بن سلمان سمیت دیگر اعلیٰ حکام سے ملاقات کی تھی اور عمرے کی سعادت بھی حاصل کی تھی۔
لائیو ٹی وی