'فوج کے جوان کووڈ ایس او پیز پر عمل درآمد کرانے کیلئے ملک کے طول و عرض میں پہنچ چکے ہیں'
پاک فوج کے شعبہ تعلقات عامہ 'آئی ایس پی آر' کے ڈائریکٹر جنرل (ڈی جی) میجر جنرل بابر افتخار نے کہا کہ آج صبح 6 بجے سے ملک کے طول و عرض میں ہر ضلعے کی سطح پر فوج کے جوان سول اداروں کی مدد کے لیے پہنچ چکے ہیں، آرٹیکل 245 کے تحت ملک بھر میں ہر انتظامی ڈویژن کی سطح پر ایک ٹیم تعینات کر دی گئی ہے۔
ڈی جی آئی ایس پی آر نے ملک میں کورونا وائرس کی تیسری لہر کے دوران پاک فوج کی تعیناتی کے حوالے سے بریفنگ دیتے ہوئے کہا کہ پاکستان میں اس وقت کورونا کی تیسری لہر جاری ہے اور یہ لہر پہلی دونوں سے کہیں زیادہ خطرناک اور جان لیوا ثابت ہو رہی ہے۔
مزید پڑھیں: کورونا ایس او پیز پر عملدرآمد کروانے کیلئے پاک فوج کی تعیناتی کا نوٹیفکیشن جاری
انہوں نے کہا کہ پوری دنیا بالخصوص ہمارا خطہ اس وبا سے شدید متاثر ہو رہا ہے، وبا کی شدت اور تیز رفتار پھیلاؤ کی وجہ سے اموات میں بھی تیزی سے اضافہ ہو رہا ہے، شدید متاثرہ مریضوں کی تعداد میں بے پناہ اضافے سے صحت کا ڈھانچہ شدید دباؤ کا شکار ہے۔
ان کا کہنا تھا کہ ملک میں اس وقت آکسیجن کی مجموعی پیداوار کا 75 فیصد سے زائد صحت کے شعبے کے لیے مختص ہے، کورونا کی صورت حال برقرار رہی تو صنعت کے لیے مختص آکسیجن بھی صحت کے شعبے کے لیے وقف کرنا پڑ سکتی ہے۔
بریفنگ میں انہوں نے کہا کہ پاکستان میں اس وقت کووڈ-19 سے متاثرہ 90 ہزار فعال کیسز موجود ہیں، مثبت شرح خطرناک حد تک بڑھ گئی ہے۔
انہوں نے کہا کہ ملک بھر میں 51 شہروں میں مثبت شرح 5 فیصد سے زیادہ ہے جبکہ اسلام آباد، پشاور، مردان، نوشہرہ، چارسدہ، صوابی، راولپنڈی، لاہور، فیصل آباد، ملتان، بہاولپور، گوجرانوالا، کراچی اورحیدر آباد، کوئٹہ اور مظفرآباد بالخصوص وہ شہر ہیں جہاں مثبت شرح انتہائی زیادہ ہے۔
ان کا کہنا تھا کہ ان 16 شہروں میں اس ہی مناسبت سے پاکستان آرمی کی تعیناتی کردی گئی ہے۔
میجر جنرل بابر افتخار نے کہا کہ 23 اپریل کو اب تک کورونا کی وجہ سے سب سے زیادہ اموات ہوئیں، جس میں 157 افراد اس دن کورونا کی وجہ سے اپنی زندگی سے محروم ہوگئے۔
انہوں نے کہا کہ اس وقت ملک بھر میں 570 افراد وینٹی لیٹرز پر ہیں اور 4 ہزار 300 کورونا سے متاثرہ افراد کی حالت تشویش ناک ہے، چند شہروں اور ہسپتالوں میں 90 فیصد سے زائد وینٹی لیٹرز بھرے ہوئے ہیں۔
ان کا کہنا تھا کہ اپریل میں کورونا سے اموات کا تناسب سب سے زیادہ رہا ہے، 26 فروری 2020 سے آج تک پاکستان میں اس وبا کی وجہ سے 17 ہزار 187 افراد اپنے پیاروں سے بچھڑ چکے ہیں۔
کورونا سے ہونے والے نقصانات سے آگاہ کرتے ہوئے انہوں نے کہا کہ اس وقت دنیا میں کورونا کی وجہ سے شرح اموات 2.12 فیصد ہے جبکہ اس وبا کے دوران پاکستان میں پہلی مرتبہ دنیا کے مقابلے میں شرح اموات بڑھ کر 2.16 فیصد ہوگئی ہیں۔
انہوں نے کہا کہ 23 اپریل کو وزیراعظم کی سربراہی میں قومی رابطہ کمیٹی کا اہم اجلاس ہوا جس میں چیف آف آرمی اسٹاف بھی موجود تھے۔
یہ بھی پڑھیں: بڑھتے کیسز کے پیش نظر خیبر پختونخوا حکومت کی وفاق سے فوج بھیجنے کی درخواست
ان کا کہنا تھا کہ تمام اسٹیک ہولڈرز کی مشاورت اور باہمی رضامندی سے این سی سی نے کورونا وبا کی تیسری لہر پر قابو پانے کے لیے چند غیر طبی مداخلت کے حوالے سے چند اہم اور بروقت فیصلے کیے۔
ڈی جی آئی ایس پی آر نے کہا کہ وبا کی اس بگڑتی ہوئی صورت حال کو مدنظر رکھتے ہوئے، عوام کی حفاظت اور صحت عامہ کے تحفظ کے لیے وفاقی حکومت کے احکامات کے مطابق ملک بھر میں پاکستان آرمی آرٹیکل 245 کے تحت سول ادارو کی معاونت کے لیے طلب کیا گیا ہے۔
انہوں نے کہا کہ عوام کا اعتماد افواج پاکستان کا اثاثہ ہے، آزمائش کی اس گھڑی میں پاک فوج اپنی تمام تر صلاحیتوں کو بروئے کار لاتے ہوئے عوام کی صحت اور حفاظت کے لیے ہر ممکن اقدام کرے گی اور ملک کے طول و عرض میں ہر کونے پر پہنچ کر عوام کی حفاظت یقینی بنائیں گے۔
ان کا کہنا تھا کہ کورونا وبا کے خلاف حفاظتی تدابیر پر عمل درآمد اور امن و عامہ کی بنیادی ذمہ داری سول اداروں کی ہے۔
میجر جنرل بابر افتخار کا کہنا تھا کہ پاکستان آرمی ایمرجنسی ریسپونڈر کے طور پر وبا کے پھیلاؤ کو روکنے کے لیے دیگر قانون نافذ کرنے والے اداروں کی بھرپور معاونت کرے گی۔
'کسی قسم کا انٹرنل سیکیورٹی الاؤنس نہیں لیا جائے گا'
انہوں نے کہا کہ آج صبح 6 بجے سے ملک کے طول و عرض میں ہر ضلعے کی سطح پر فوج کے جوان سول اداروں کی مدد کے لیے پہنچ چکے ہیں، آرٹیکل 245 کے تحت ملک بھر میں ہر انتظامی ڈویژن کی سطح پر ایک ٹیم تعینات کر دی گئی ہے۔
ان کا کہنا تھا کہ تمام ڈویژن کی سطح پر ان ٹیموں کی سربراہی برگیڈیئرز رینک کے افسر کریں گے اور ہر ضلعے کی سطح پر لیفٹیننٹ کرنل کی سربراہی میں فوجی جوان سول انتظامیہ کی مدد کے لیے پہنچ چکے ہیں۔
انہوں نے کہا کہ پاک فوج کے جوانوں کی تعیناتی کا بنیادی مقصد سول حکومت اور قانون نافذ کرنے والے اداروں کی معاونت ہے۔
میجر جنرل بابر افتخار نے کہا کہ پاکستان آرمی نے اس تعیناتی کے دوران پچھلی مرتبہ کی طرح کسی قسم کے انٹرنل سیکیورٹی الاؤنس نہ لینے کا فیصلہ کیا ہے۔
ان کا کہنا تھا کہ تمام صوبائی ایپکس کمیٹیوں کا اجلاس ہفتے میں ایک دن ہوگا جن میں مجموعی صورت حال اور خاص کر زیادہ شرح مثبت کا جائزہ لیا جائے گا اور اس حوالے سے حکمت عملی ترتیب دی جائے گی۔
یاد رہے کہ وفاقی وزارت داخلہ نے گزشتہ روز کورونا وائرس کا پھیلاؤ روکنے کے لیے ایس او پیز پر عملدرآمد کروانے کے لیے صوبوں اور وفاقی اکائیوں میں پاک فوج کی تعیناتی کا نوٹیفکیشن جاری کیا تھا۔
مائیکرو بلاگنگ ویب سائٹ ٹوئٹر پر جاری کردہ ایک ویڈیو پیغام میں وزیر داخلہ شیخ رشید نے بتایا تھا کہ نوٹیفکیشن کے مطابق پنجاب، خیبرپختونخوا، بلوچستان، اسلام آباد، گلگت بلتستان اور آزاد کشمیر ایس او پیز نافذ کرنے کے لیے فوج کی خدمات لیں گے۔
وفاقی وزیر داخلہ کا کہنا تھا کہ فوج ہمیشہ ملک میں سیلاب زلزلے سمیت تمام قدرتی آفات میں اپنی قوم کے ساتھ کھڑی ہوئی ہے۔
چنانچہ 23 اپریل کو وزیراعظم عمران کی سربراہی میں قومی رابطہ کمیٹی کا اجلاس ہوا تھا جس میں یہ طے ہوا تھا کہ کووِڈ 19 ایس او پیز پر عملدرآمد کے لیے فوج کی خدمات لی جائیں گی اور انہیں تمام صوبوں میں یہ ذمہ داری دی جائے، اس لیے آج وزارت داخلہ نے نوٹیفکیشن جاری کردیا۔
وزیر داخلہ نے مزید کہا تھا کہ یہ ایک بڑا فیصلہ ہے کیوں کہ ہمارے پڑوسی ملک بھارت میں یومیہ ساڑھے 3 سے 4 لاکھ کیسز سامنے آرہے ہیں ایسی صورتحال میں پاک فوج کو یہ ذمہ داری دی گئی ہے تا کہ صحیح طور پر کووِڈ 19 کے ایس او پیز پر عملدرآمد کروایا جاسکے۔
لائیو ٹی وی