برٹنی اسپیئرز والد کی سرپرستی ختم کرانے تیسری بار عدالت پہنچ گئیں
امریکی گلوکارہ، اداکارہ، ڈانسر وپروڈیوسر 39 سالہ برٹنی اسپیئرز نے ایک بار پھر والد کی ’سرپرستی‘ ختم کروانے کے لیے عدالت میں درخواست دائر کردی۔
برٹنی اسپیئرز کے والد جیمی اسپیئرز 2008 سے اداکارہ کے (conservator) یعنی قانونی طور پر ’سرپرست‘ ہیں اور اداکارہ گزشتہ دو سال سے والد کی مذکورہ حیثیت ختم کروانے کے لیے کوشاں ہیں۔
برٹنی اسپیئرز کے والد کو امریکی عدالت نے 2008 میں اس وقت گلوکارہ کا ’سرپرسٹ‘ مقرر کیا تھا جب کہ اداکارہ کی ذہنی حالت ٹھیک نہیں تھی اور وہ اپنے فیصلے بھی کرنے کے اہل نہیں تھیں۔
گزشتہ 13 سال سے والد ہی اداکارہ کے تمام معاملات دیکھ رہے ہیں اور برٹنی اسپیئرز والد کی اجازت کے بغیر کوئی کام نہیں کر سکتیں، یہاں تک وہ کسی شو میں پرفارمنس یا کسی مرد سے تعلقات بھی اپنے والد کی مرضی سے استوار کرنے کی پابند ہیں۔
یہ بھی پڑھیں: برٹنی اسپیئرز والد کی سرپرستی ختم کرانے کی خواہاں
ایسی پابندیوں کی وجہ سے ہی برٹنی اسپیئرز نے گزشتہ برس دو بار لاس اینجلس کی عدالت میں والد کی ’سرپرستی‘ ختم کروانے کی درخواستیں دائر کی تھیں مگر دونوں بار ان کی درخواستیں مسترد کردی گئی تھیں۔
تاہم عدالت نے گلوکارہ کی درخواست پر ان کی ’سرپرستی‘ کے معاملات میں تبدیلیاں کرتے ہوئے برٹنی اسپیئرز کی جانب سے بتائے گئے ایک مینیجمنٹ ادارے (Bessemer Trust) کو بھی اداکارہ کا شریک سرپرست بنایا تھا۔
تاہم اب برٹنی اسپیئرز نے ایک بار پھر والد کی ’سرپرستی‘ ہمیشہ کے لیے ختم کروانے کے لیے عدالت میں درخواست دائر کردی۔
خبر رساں ادارے ’رائترز‘ کے مطابق برٹنی اسپیئرز کے وکلا نے لاس اینجلس کی عدالت میں درخواست دائر کی ہے کہ گلوکارہ کے والد کو ہمیشہ کے لیے ’سرپرستی‘ سے ہٹاکر دوسرے شخص کو ’سرپرست‘ مقرر کیا جائے۔
گلوکارہ کی جانب سے درخواست میں اپیل کی گئی ہے کہ اب ان کے ’سرپرست‘ کے طور پر گلوکارہ کے منیجر (Jodi Montgomery) کو ’سرپرست‘ تعینات کیا جائے۔
گلوکارہ کی درخواست پر 17 مارچ کو سماعت ہونی تھی مگر عدالت نے بعض وجوہات پر سماعت کو ایک ماہ تک ملتوی کردیا اور اب مذکورہ کیس کی سماعت اپریل میں ہوگی۔
مزید پڑھیں: برٹنی اسپیئرز کے والد مزید کچھ مدت کیلئے ان کے سرپرست مقرر
گلوکارہ کے وکلا کے مطابق وہ اگلی سماعت میں پیش ہوکر اپنا کیس لڑیں گے اور ان کا کیس کافی مضبوط ہے اور انہیں یقین ہے کہ اس بار عدالت گلوکارہ کی درخواست کو قبول کرے گی۔
دوسری جانب برٹنی اسپیئرز کے مداحوں نے ’فری برٹنی اسپیئرز‘ مہم کے تحت مظاہرے جاری رکھے ہوئے ہیں اور ان کا ماننا ہے کہ اب گلوکارہ ذہنی طور پر ٹھیک ہیں، اس لیے انہیں ’سرپرستی‘ کے نظام سے آزاد کیا جائے۔
لائیو ٹی وی