ٹوئٹر میں میسج کو بھیجنے کے بعد روکنے کے فیچر پر کام جاری
سماجی رابطے کی ویب سائٹ ٹوئٹر کے صارفین کی جانب سے عرصے سے ایک ایڈٹ بٹن کا مطالبہ کیا جارہا ہے تاکہ ٹوئیٹ میں کوئی غلطی چلی جانے پر اسے ڈیلیٹ کیے بغیر ٹھیک کرنا ممکن ہو۔
تاہم ایڈٹ بٹن کا تو پتا نہیں کب تک صارفین کو دستیاب ہوسکے گا مگر میسج کو ان ڈو سینڈ (undo send) کرنے کے فیچر پر بظاہر ضرور کام ہورہا ہے۔
متعدد ایپس کی اپ ڈیٹس پر نظر رکھنے والی ٹوئٹر صارف اور ڈویلپر جین مینچون وونگ نے ایک ٹوئٹ میں یہ بات بتائی۔
انہوں نے ایک انیمٹڈ اسکرین شاٹ بھی شیئر کیا جس سے عندیہ ملتا ہے کہ یہ فیچر کس طرح کام کرے گا۔
اسکرین شاٹ میں دکھایا گیا ہے کہ ایک میسج بھیجنے کے بعد چند سیکنڈوں تک ان ڈو ٹائمز کا آپشن صارفین کے سامنے شو ہوگا۔
یہ فیچر جی میل کے ای میل بھیجنے کے عمل کو ان ڈو کرنے سے ملتا جلتا لگتا ہے، بس اس میں ان ڈو بٹن صارفین کے سامنے ہوگا۔
مختلف افواہوں کے مطابق ان ڈو سینڈ فیچر ٹوئٹر کے سبسکرائپشن پروگرام کا حصہ ہوسکتا ہے۔
یہ ویسا ایڈٹ بٹن تو نہیں جس کا مطالبہ صارفین کی جانب سے عرصے سے کیا جارہا ہے مگر پھر بھی لوگوں کو ایک ٹوئٹ کو فوری طور پر روکنے کا موقع ضرور مل سکے گا۔
رواں سال کے شروع میں بلومبرگ نے ایک رپورٹ میں بتایا تھا کہ ٹوئٹر کی جانب سے پیڈ سبسکرائپشنز پروگرام پر کام کیا جارہا ہے تاکہ اشتہاری آمدنی پر انحصار کم کیا جاسکے۔
اس سبسکرائپشن پروگرام میں مختلف فیچرز جیسے ان ڈو سینڈ اور پروفائل کسٹمائزیشن جیسے آپشنز موجود ہوں گے۔
اسی طرح کا ایک فیچر سپر فالوز کو حال ہی میں کمپنی کی جانب سے متعارف بھی کرایا گیا ہے۔
لائیو ٹی وی