بگ بیش لیگ: عماد وسیم نے میلبورن رینیگیڈ سے معاہدہ کرلیا
آسٹریلیا کی ٹی ٹوئنٹی بِگ بیش لیگ (بی بی ایل) کے دوسرے حصے کے لیے پاکستان کرکٹ ٹیم کے آل راؤنڈر عماد وسیم نے میلبورن رینیگیڈ سے معاہدہ کر لیا۔
کرک انفو کی رپورٹ کے مطابق عماد وسیم پاکستان اور نیوزی لینڈ کے درمیان 3 میچز پر مشتمل ٹی ٹوئنٹی سیریز مکمل ہونے کے بعد 26 دسمبر کو میلبورن رینیگیڈ کو جوائن کریں گے۔
31 سالہ آل راؤنڈر آسٹریلیا اور نیوزی لینڈ کے درمیان سفر کے باعث چھوٹ کی وجہ سے آسٹریلیا پہنچ کر قرنطینہ کے بغیر کھیل کا آغاز کریں گے۔
میلبورن رینیگیڈ کے کوچ مائیکل کِلنگر نے کہا کہ 'عماد ٹی ٹوئنٹی کے دنیا کے بہترین کھلاڑیوں میں سے ایک ہیں، جو اپنی باؤلنگ سے میچ پر اثر ڈالنے اور بلے بازی سے اننگز کے خاتمے کی صلاحیت رکھتے ہیں'۔
یہ بھی پڑھیں: بابر کے بعد شاہین اور عماد کا بھی ٹی20 بلاسٹ میں معاہدہ
میلبورن رینیگیڈ میں عماد وسیم کے علاوہ غیر ملکی کھلاڑیوں میں جنوبی افریقہ کے رائلی روسوو اور عمران طاہر جبکہ افغانستان کے محمد نبی اور نور احمد بھی شامل ہیں۔
بگ بیش میں رواں سال ایک میچ میں تین غیر ملکی کھلاڑیوں کو کھلانے کی اجازت دی گئی ہے۔
لائیو ٹی وی