گلگت بلتستان انتخابات میں کامیاب ہونے والے 4 آزاد امیدوار پی ٹی آئی میں شامل

امتیاز تاج | ویب ڈیسک شائع November 19, 2020

ان 4 ارکان کی شمولیت سے تحریک انصاف کی گلگت بلتستان میں نشستوں کی مجموعی تعداد 13 ہوگئی ہے — فائل فوٹو / جی بی کلرز ڈاٹ کام

گلگت بلتستان انتخابات میں کامیاب ہونے والے بلتستان ریجن کے چاروں آزاد امیدوار پاکستان تحریک انصاف (پی ٹی آئی) میں شامل ہو گئے۔

حلقہ جی بی اے 9 سے کامیاب آزاد امیدوار وزیر سلیم، حلقہ 10 سے راجہ ناصر، حلقہ 22 سے مشتاق حسین اور حلقہ 23 سے عبدالحمید پی ٹی آئی میں شامل ہوئے ہیں۔

آزاد ارکان کو تحریک انصاف کے چیف آرگنائزر سیف اللہ نیازی، گورنر گلگت بلتستان راجہ جلال الدین اور وفاقی وزیر علی امین گنڈاپور نے ہار پہنا کر جماعت میں خوش آمدید کہا۔

ان 4 ارکان کی شمولیت سے تحریک انصاف کی گلگت بلتستان میں نشستوں کی مجموعی تعداد 13 ہوگئی ہے، جبکہ مجلس وحدت المسلمین (ایم ڈبلیو ایم) نے بھی ایک نشست کے ساتھ تحریک انصاف کی حمایت کی ہے۔

یہ بھی پڑھیں: گلگت بلتستان انتخابات: پی ٹی آئی 9 نشستوں کے ساتھ سب سے آگے

واضح رہے کہ 15 نومبر کو منعقد ہونے والے گلگت بلتستان انتخابات میں تحریک انصاف کے بعد آزاد امیدواروں نے سب سے زیادہ 7 نشستوں پر کامیابی حاصل کی تھی۔

گلگت بلتستان کی تیسری قانون ساز اسمبلی کی 24 جنرل نشستوں کے لیے 4 خواتین سمیت 330 اُمیدوار انتخابات میں حصہ لیا، تاہم ووٹنگ 23 نشستوں پر ہوئی کیونکہ پی ٹی آئی گلگت بلتستان کے صدر جسٹس (ر) جعفر شاہ کے کورونا وائرس کی وجہ سے وفات کے بعد جی بی ایل اے 3 میں انتخابات ملتوی کردیے گئے تھے۔

اپوزیشن کی جماعتوں بالخصوص مسلم لیگ (ن) اور پاکستان پیپلز پارٹی (پی پی پی) نے انتخابات میں 'چوری' اور 'دھاندلی' کے الزامات عائد کرتے ہوئے نتائج کو مسترد کردیا تھا۔

پیپلز پارٹی کی جانب سے مبینہ دھاندلی کے خلاف احتجاجی دھرنا بھی دیا جارہا ہے۔