عمران خان، حیدر علی اور کاشف بھٹی کا دوسرا کورونا ٹیسٹ بھی منفی آگیا
پاکستان کرکٹ ٹیم کے کھلاڑی عمران خان، حیدر علی اور کاشف بھٹی کا تین روز میں کورونا کا دوسرا ٹیسٹ بھی منفی آگیا جس کے بعد یہ کھلاڑی انگلینڈ میں قومی ٹیم کو جوائن کرنے کے اہل ہوگئے ہیں۔
پاکستان کرکٹ بورڈ (پی سی بی) سے جاری بیان کے مطابق ان کھلاڑیوں کے دوسرے ٹیسٹ 4 جولائی کو ہوئے۔
اس سے قبل یکم جولائی کو ہونے والے کورونا ٹیسٹ میں بھی ان کھلاڑیوں کے نتائج منفی آئے تھے۔
ان تینوں کھلاڑیوں کے علاوہ مساج تھراپسٹ ملنگ علی اور محمد عمران کے کووڈ 19 ٹیسٹ بھی مسلسل دو مرتبہ منفی آئے ہیں۔
مزید پڑھیں: قومی ٹیم کے 6 کھلاڑیوں کا کورونا ٹیسٹ دوبارہ منفی، انگلینڈ میں اسکواڈ کا حصہ بن سکیں گے
بیان میں کہا گیا کہ کرکٹ بورڈ کی جانب سے ان کھلاڑیوں اور ایک ٹیم آفیشل کے سفر کے انتظامات کیے جارہے ہیں اور اس حوالے سے تفصیلات جلد جاری کی جائیں گی۔
واضح رہے کہ 30 جون کو قومی کرکٹ ٹیم کے 6 کھلاڑیوں کے کورونا وائرس کے ٹیسٹ 2 مرتبہ منفی آنے کے بعد یہ تمام کھلاڑی بھی انگلینڈ میں موجود قومی ٹیم کا حصہ بننے کے اہل ہوگئے تھے۔
پی سی بی کے بیان میں کہا گیا تھا کہ فخرزمان، محمد حسنین، محمد حفیظ، محمد رضوان، شاداب خان اور وہاب ریاض کے گزشتہ 3 روز میں کووڈ 19 کے 2 ٹیسٹ منفی آئے۔
خیال رہے کہ 28 جون کو پاکستانی ٹیم 3 ٹیسٹ اور تین ٹی 20 میچوں کی سیریز کے لیے دورہ انگلینڈ پر روانہ ہوئی تھی، جس میں وہ 10 کھلاڑی شامل نہیں تھے جن کے کورونا کے ٹیسٹ مثبت آئے تھے۔
دورہ انگلینڈ کے لیے قومی ٹیم کے ابتدائی طور پر 29رکنی اسکواڈ کا اعلان کیا گیا تھا تاہم اعلان کردہ کھلاڑیوں کے ٹیسٹ لیے گئے تو 10 کھلاڑیوں اور ایک اسٹاف کے رکن میں کورونا کی تصدیق ہوئی تھی۔
بعد ازاں پاکستان کرکٹ بورڈ نے کورونا وائرس کا شکار ان 10 کھلاڑیوں کے بغیر 20 رکنی اسکواڈ کا اعلان کیا تھا حالانکہ ان میں سے 6 کھلاڑیوں کے ٹیسٹ 27 جون کو منفی آنے کا انکشاف ہوا تھا۔
یہ بھی پڑھیں: دورہ انگلینڈ: پی سی بی نے دو منفی ٹیسٹ کی پالیسی پر نظرثانی شروع کردی
اس حوالے سے ایک بیان میں پی سی بی نے بتایا تھا کہ محمد حسنین، شاداب خان، فخر زمان، محمد رضوان، محمد حفیظ اور وہاب ریاض کا ٹیسٹ منفی آیا ہے تاہم وہ انگلینڈ جانے والی 20 رکنی ٹیم میں شامل ہونے سے قبل ایک مرتبہ پھر ٹیسٹ کے عمل سے گزریں گے۔
یاد رہے کہ پاکستان کرکٹ نے جس 20 رکنی اسکواڈ کا اعلان کیا تھا اس میں اظہر علی، بابر اعظم، عابد علی، اسد شفیق، فہیم اشرف، فواد عالم، عامد وسیم، امام الحق، خوشدل شاہ، محمد موسیٰ، محمد عباس، نسیم شاہ، روحیل نذیر، سرفراز احمد، شاہین شاہ آفریدی، شان مسعود، سہیل خان، عثمان شنواری، اور یاسر شاہ شامل ہیں۔
اس کے علاوہ اسپورٹس اسٹاف مصباح الحق، یونس خان، منیجر منصور رانا، مشتاق احمد، شاہد اسلم، عبدالمجید، طلحہٰ بٹ، یاسر ملک، ڈاکٹر سہیل سلیم، کرنل ریٹائرڈ عثمان انوری اور رضا کچلیو شامل ہیں۔
لائیو ٹی وی