چین میں آزادی اظہار رائے کے خلاف کارروائی میں تیزی، صحافی کو 15 سال قید کی سزا
عدالتی دستاویزات کے مطابق چین کے سب سے طاقتور پروپیگنڈا اداروں میں کام کرنے والے صحافی کو حکمران کمیونسٹ پارٹی پر تنقید کرنے کے الزام میں 15 سال قید کی سزا سنائی گئی ہے۔
چن جیرن کو سنائی جانے والی یہ سزا صدر شی جن پنگ کی سربراہی میں چین کی حکومت کی آزادانہ تقریر کے خلاف ابھی تک کی ایک سخت ترین سزا ہے، جس نے صحافت کو مضطرب کردیا ہے اور چینی میڈیا کو حکمران کمیونسٹ پارٹی کے مفادات کی خدمت کا حکم دیا گیا ہے۔
یہ واقعہ ایسے وقت میں سامنے آیا جب چین کو کورونا وائرس وبائی مرض سے نمٹنے پر بین الاقوامی سطح پر تحقیقات کا سامنا کرنا پڑ رہا ہے جس میں یہ سوالات بھی شامل ہیں کہ حکام نے اہم معلومات کو روکا جس سے وائرس کو عالمی سطح پر پھیلنے سے روکا جاسکتا تھا۔
مزید پڑھیں: پاکستان میں کورونا کیسز کی تعداد 16800 سے زائد، اموات 385 تک پہنچ گئیں
غیر ملکی خبر رساں ادارے اے ایف پی کی رپورٹ کے مطابق کمیونسٹ پارٹی کے پروپیگنڈا اخبار پیپلز ڈیلی کے سابق صحافی چن جیرن کو جمعرات کے روز ’جھگڑوں کا انتخاب اور مصیبت لانے، بھتہ خوری، غیر قانونی کاروباری کاموں اور رشوت کے الزام میں سزا سنائی گئی‘۔
’جھگڑوں کا انتخاب اور مصیبت لانے‘ کا الزام ایک ایسی قانونی گرفت ہے جس کا چینی حکام بعض اوقات ایسے لوگوں کے خلاف استعمال کرتے ہیں جو حکومت پر تنقید کرتے ہیں۔
عدالتی بیان میں کہا گیا کہ چن جیرن نے قانونی مشورے فراہم کرنے کی آڑ میں متعلقہ مقدمات کی سرکوبی کے لیے ’غلط‘ اور ’منفی‘ معلومات آن لائن شائع کی ہیں۔
بیان میں کہا گیا کہ چن جیرن اپنی سابقہ اہلیہ اور 3 دیگر افراد کے ساتھ ایک ’شیطانی قوت‘ کا حصہ تھے جس نے اپنی سرگرمیوں سے غیرقانونی طور پر 73 لاکھ یوآن (10 لاکھ امریکی ڈالر) حاصل کیا۔
یہ بھی پڑھیں: یوم مزدور کے موقع پر صدر و وزیراعظم کا کورونا سے متاثرہ افراد سے اظہار یکجہتی
چینی انسانی حقوق کے محافظوں کے مبصر نے ان کی فوری اور غیر مشروط رہائی کا مطالبہ کرتے ہوئے کہا ہے کہ ’واضح ہے کہ چن جیرن کو سوشل میڈیا ایپلی کیشن وی چیٹ اور دوسرے سوشل میڈیا پلیٹ فارمز پر سیاسی تقریر کی سزا سنا دی گئی ہے’۔
ان کا کہنا تھا کہ چن جیرن کو سرکاری میڈیا کے آؤٹ لیٹس سے برطرف کیا جاچکا ہے جن میں چائنا یوتھ ڈیلی، بیجنگ ڈیلی اور پیپلز ڈیلی شامل ہیں۔
تب سے انہوں نے سوشل میڈیا پر تبصرے اور تحقیقاتی رپورٹس شائع کرنے کا آغاز کیا تھا۔
مبصرین نے چینی حکام پر چن جیرن پر منصفانہ مقدمے کی تردید کرنے کا الزام عائد کیا۔
لائیو ٹی وی