فائل فوٹو --.

کراچی: کراچی کے علاقے سائٹ ایریا میں واقع جامعہ بنوریہ سے ملنے والے ریموٹ کنٹرول بم کو بم ڈسپوزل اسکواڈ نے ناکارہ بنادیا ہے-

پانچ سو گرام وزنی بم کے ساتھ تحریک طالبان کی پرچی بھی منسلک تھی جس پر لکھا تھا 'طالبان کی طرف سے تحفہ'۔

سائٹ بنوریہ ٹاؤن مدرسے میں مشکوک بریف کیس کی موجودگی کی اطلاع پر بم ڈسپوزل اسکواڈ کو طلب کیا گیا جس نے جائزے کے بعد مشکوک بریف کیس میں بم کی موجودگی کی تصدیق کردی

تصدیق کے بعد علاقے میں خوف و ہراس پھیل گیا اور مدرسے کو خالی کرالیا گیا۔

تاہم، بم ڈسپوزل اسکواڈ نے انتہائی مہارت سے بم کو ناکارہ بنادیا۔

پولیس ذرائع کے مطابق بم کا مجموعی وزن پانچ سو گرام تھا جس میں دو پیکٹ کٹ اسکرو ڈالے گئے تھے اور بم میں نو والٹ کی بیٹری اور ڈیٹونیٹر بھی نصب تھا، جس میں ریموٹ کنٹرول ڈیوائس لگائی گئی تھی۔

پولیس ذرائع نے مزید بتایا کہ بارود کے ساتھ ایک پرچی ملی ہے جس پر تحریر ہے کہ یہ بم تحریک طالبان کی جانب سے تحفہ ہے۔ بم ڈسپوزل ڈسپوزل اسکواڈ کے ماہرین کا کہنا ہے کہ بم انتہائی مہارت سے تیار کیا گیا تھا جس کے پھٹنے سے بڑی تباہی ہوسکتی تھی۔

بم ڈسپوزل اسکواڈ نے بارود کے نمونے کیمائی تجزیئے کے لیے لیبارٹری روانہ کردیئے ہیں۔