زخمی آملہ کی تیسرے ون ڈے میں شرکت مشکوک
کولمبو: جنوبی افریقہ کرکٹ ٹیم کے مایہ ناز بلے باز ہاشم آملہ کی فٹنس مسائل کی وجہ سے سری لنکا کے خلاف تیسرے ون ڈے انٹرنیشنل میں شرکت مشکوک ہو گئی۔
کولمبو میں کھیلے گئے دوسرے ون ڈے میچ میں ہاشم آملہ باؤنڈری پر گیند روکنے کی کوشش میں گر گئے جس کی وجہ سے انہیں بائیں گھٹنے میں شدید چوٹ آئی- انہیں طبی امداد کے بعد ٹیم ممبر اور میڈیکل سٹاف کی مدد سے پویلین پہنچایا گیا۔
ٹیم منیجر محمد موسیٰ جی کا کہنا ہے کہ اس قسم کی انجری سے چھٹکارا حاصل کرنے کیلئے کم از کم ایک ہفتہ درکار ہوتا ہے مگر ہماری کوشش ہے کہ انہیں بہترین طبی امداد فراہم کریں تا کہ وہ تیسرے ون ڈے میچ سے قبل مکمل طور پر فٹ ہو سکیں۔
انہوں نے کہا کہ تیسرا ون ڈے میچ ہمارے لئے بہت اہمیت کا حامل ہے اس لئے ہاشم آملہ کا فٹ ہونا بہت ضروری ہے۔ ان کا کہنا تھا کہ ہاشم آملہ کی شرکت کے حوالے سے فیصلہ میچ سے قبل کیا جائے گا۔
واضح رہے کہ ہاشم آملہ گردن کی تکلیف کے باعث پہلا ون ڈے بھی نہیں کھیل سکے تھے۔ جنوبی افریقہ اور سری لنکا کے درمیان تیسرا ون ڈے میچ جمعہ کو پالے کیلی میں کھیلا جائے گا۔
جنوبی افریقہ کو پانچ میچز کی سیریز 2-0 کے خسارے کا سامنا ہے۔
لائیو ٹی وی