شاہد آفریدی کا سرفراز کو ٹیسٹ ٹیم کی قیادت چھوڑنے کا مشورہ
قومی ٹیم کے سابق کپتان اور مایہ ناز آل راؤنڈر شاہد آفریدی نے سرفراز احمد کو ون ڈے اور ٹی20 ٹیم پر توجہ مرکوز رکھنے کی ہدایت کرتے ہوئے ٹیسٹ ٹیم کی قیادت چھوڑنے کا مشورہ دیا۔
قومی ٹیم کے سابق کپتان شاہد آفریدی کراچی میں کینسر میں مبتلا اپنے پرستار بچے سے ملنے ان کے گھر گئے جہاں انہوں نے 13 سالہ سید حسن کی مزاج پرسی کی اور ان کی جلد صحتیابی کے لیے دعا بھی کی۔
مزید پڑھیں: شاہد آفریدی کی کراچی میں اپنے مداح کو کینسر کے علاج کی پیشکش
اس موقع پر شاہد آفریدی نے میڈیا سے بات کرتے ہوئے کہا کہ فینز میرا اثاثہ ہیں اور انہوں نے ہمیشہ میری بہت حوصلہ افزائی کی۔ بوم بوم آفریدی نے مریض سید حسن کو علاج کرانے کی پیشکش بھی کی۔
سابق کپتان نے کہا کہ نئے ڈومیسٹک کرکٹ نظام کو وقت دیں، 6 ٹیموں کا نظام بہتر ہے کیونکہ اس سے نیا ٹیلنٹ سامنے آئے گا جبکہ جونیر سطح پر کھلاڑیوں کی تربیت میں بھی ملے گی۔
انہوں نے مستقبل کے لیے قومی ٹیم کے لیے نوجوان کھلاڑیوں کو تیار کرنے کے لیے سابق کرکٹرز شعیب اختر، محمد یوسف اور یونس خان کو انڈر 19 ٹیم کی ذمے داریاں دینے کی بھی تجویز پیش کی۔
آفریدی نے مصباح کو چیف سلیکٹر اور ہیڈ کوچ بنانے پر مبارباد دیتے ہوئے کہا کہ مصباح محنتی ہے اور 24 گھنٹے کام کرتا ہے، ہیڈ کوچ اور چیف سلیکٹر بننا بڑا چیلنج ہے لیکن مصباح دونوں عہدوں سے انصاف کرنے کی صلاحیت رکھتے ہیں۔
یہ بھی پڑھیں: شاہد آفریدی کی اصل عمر کیا ہے؟ برسوں بعد پتا چل گیا
سابق مایہ ناز آل راؤنڈر نے کہا کہ سرفراز کو ون ڈے اور ٹی20 کرکٹ کپتان بنانا درست ہے لیکن تینوں فارمیٹ کو لے کر چلنا مشکل ہے لہٰذا سرفراز احمد ون ڈے اور ٹی20 پر فوکس کریں اور ٹیسٹ ٹیم کی قیادت چھوڑ دیں۔
اہم سری لنکن کھلاڑیوں کی جانب سے دورہ پاکستان سے انکار کے حوالے سے سابق کپتان نے کہا کہ سری لنکن کھلاڑیوں پر انڈین پریمیئر(آئی پی ایل) کی جانب سے بڑا دباؤ ہے تاہم سری لنکا کرکٹ بورڈ کو چاہیے کہ وہ اپنے کھلاڑیوں کو پاکستان آنے پر رضامند کرے، ہم نے سری لنکا کو ہمیشہ سپورٹ کیا ان کو لازمی آنا چاہیے۔
ایک سوال کے جواب میں انہوں نے کہا کہ بھارت میں بہت کھیلا سب نے مجھے عزت دی ہےاور بھارت میں ہر کوئی مودی نہیں اچھے لوگ بھی ہیں، مودی گندہ کردار ادا کر رہا ہے اور ان کے اس کردار نے پوری دنیا میں بھارت کو بدنام کردیا ہے۔
لائیو ٹی وی