پاکستان پر حملے کے بعد بھارت میں گھاس تک نہیں اُگے گی، شیخ رشید
وزیر ریلوے شیخ رشید احمد کا کہنا ہے کہ لیکن اگر پاکستان پر حملہ ہوا تو ہمارے پاس روایتی جنگ کا کوئی آپشن نہیں ہے اور یہ آخری جنگ ہوگی جس کے بعد بھارت میں گھاس تک نہیں اُگے گی۔
آزاد کشمیر میں ریلی سے خطاب کرتے ہوئے شیخ رشید احمد نے کہا کہ 'نازی مودی نے جو غلطی اور حماقت کی ہے اللہ نے کشمیر کو پاکستان سے ملانے کا فیصلہ کر لیا ہے اور لال حویلی کا رشتہ سری نگر کے لال چوک سے ہے یہ وقت بتائے گا۔'
انہوں نے کہا کہ '72 سالوں سے کشمیری اپنا خون دے رہے ہیں اور عذاب کی زدگی گزار رہے ہیں، پاکستان میچ جیتتا ہے تو 6 کشمیری شہید کر دیئے جاتے ہیں جبکہ پاکستان میں مسلم کانفرنس سے زبردست ورکرز کسی کے پاس نہیں تھے۔'
ان کا کہنا تھا کہ '72 سال تک ہم نے آج کے دن کے لیے پیسے لگائے ہیں اور ہماری فوج آج کے دن کے لیے تیار ہوئی ہے، ہماری نظر اللہ کی مدد پر ہونی چاہیے، آج عمران خان کی حکومت نے جو عالمی سطح پر پالیسی اپنائی ہے، آج ہم جو انسانی حقوق کی بات کر رہے ہیں اس کی وجہ سے عالمی میڈیا بھی ہٹلر مودی کے خلاف ہو رہا ہے۔'
مزید پڑھیں: بھارت آگ سے کھیل رہا ہے جو اس کے سیکیولرزم کو جلادے گی، صدر عارف علوی
شیخ رشید نے کہا کہ 'آج مقبوضہ کشمیر میں خوراک اور ادویات کی شدید کمی ہے، وہاں زندگی مفلوج ہے، میں عسکری نہیں سیاسی ماہر ہوں اور کشمیر کی سیاست مجھ سے زیادہ کوئی نہیں جانتا، سری نگر کی گلی گلی جانتا ہوں، دنیا جان لے کشمیری قوم، فلسطینی اور بوسنیا کی قوم جیسی نہیں۔'
انہوں نے کہا کہ 'مجھے یقین ہے کہ مودی حملہ نہیں کر سکتا، لیکن اگر پاکستان پر حملہ ہوا تو ہمارے پاس روایتی جنگ کا کوئی آپشن نہیں ہے، یہ آخری جنگ ہوگی جس کے بعد بھارت میں گھاس تک نہیں اُگے گی۔'
ان کا کہنا تھا کہ 'عمران خان نے امریکی پالیسی کو نیٹرل کیا ہے لیکن امریکا کی پالیسی پر اعتبار نہیں کیا جاسکتا، میں عمران خان کے اس فیصلے کو سلام پیش کرتا ہوں کہ بھارت سے مذاکرات کے دروازے بند ہو چکے ہیں، جس نے بھی کشمیر سے غداری کی قوم اسے کتوں کے آگے ڈال دے گی، اب ہر پاکستانی کا فرض ہے کہ عمران خان کے ساتھ کھڑا ہو۔'
یہ بھی پڑھیں: مقبوضہ کشمیر میں نسل کشی کا خطرہ ہے، عالمی ادارے کی وارننگ
وزیر ریلوے کا کہنا تھا کہ 'اگلے 5 سے 6 ماہ سیاست کی دنیا کے لیے بہت اہم ہیں، عمران خان سمجھتے ہیں کہ ایک دو ماہ میں کشمیر کا مسئلہ حل ہوجائے گا، اب کشمیر کا مسئلہ آر پار ہونا ہے اور فیصلے کا وقت آگیا تو بھارت میں ہر مسلمان کے گھر سے نعرہ تکبیر بلند ہوگا۔'
چین سے تعلقات کے حوالے سے انہوں نے کہا کہ 'چین پاکستان کے ساتھ چٹان کی طرح کھڑا ہے، ہمیں بھی چین کے ساتھ کھڑا ہونا ہے کیونکہ چین آزمودہ دوست ہے۔'
لائیو ٹی وی