'بھارت کی داخلی سیاست وزیراعظم پاکستان کو مدعو کرنے کی اجازت نہیں دیتی'
کراچی: وزیر خارجہ شاہ محمود قریشی کا کہنا ہے کہ بھارت کی 'داخلی سیاست' وزیراعظم پاکستان کو نریندر مودی کی حلف برداری کی تقریب میں مدعو کرنے کی اجازت نہیں دیتی۔
خیال رہے کہ بھارت کی جانب سے نریندر مودی کی دوسری مدت کے لیے تقریب حلف برداری میں وزیراعظم پاکستان عمران خان کو شرکت کی دعوت نہ دینے کی خبریں سامنے آئی تھیں۔
شاہ محمود قریشی نے نجی نیوز چینل کو دیے گئے انٹرویو میں بتایا کہ 'الیکشن مہم کے درمیان مودی کی تمام توجہ پاکستان کے خلاف جنگی جنون پر مرکوز تھی، اس لیے یہ توقع کرنا نادانی ہے کہ وہ اپنے اس بیانیے سے جلد پیچھے ہٹیں گے'۔
قبل ازیں برطانوی خبر رساں ادارے رائٹرز کی رپورٹ میں کہا گیا تھا کہ بھارت، نریندر مودی کی تقریب حلف برداری میں وزیراعظم عمران خان کو مدعو نہیں کرے گا۔
مزید پڑھیں: وزیراعظم عمران خان کا نریندر مودی کو فون، انتخابات میں کامیابی پر مبارکباد
بھارتی حکومت کی جانب سے جاری کیے گئے بیان میں کہا گیا تھا کہ بنگلہ دیش، میانمار، سری لنکا، تھائی لینڈ، نیپال کے رہنماؤں کو نریندر مودی کی تقریب حلف برداری میں شرکت کی دعوت دی گئی ہے۔
2014 میں پاکستان، افغانستان اور مالدیپ سمیت ساؤتھ ایشیئن ایسوسی ایشن فار ریجنل کوآپریشن (سارک) کے تمام رکن ممالک کو نریندر مودی کی تقریب حلف برداری میں شرکت کی دعوت دی گئی تھی۔
سابق وزیراعظم نواز شریف نے بھارتی ہم منصب کی تقریب میں شرکت کی تھی۔
گزشتہ شب جیو نیوز کے پروگرام میں بات چیت کرتے ہوئے وزیر خارجہ شاہ محمود قریشی نے کہا کہ گزشتہ برس انتخابات میں کامیابی کے بعد بھارتی وزیراعظم نے اپنے پاکستانی ہم منصب کو مبارک باد دی تھی اور خط بھی لکھا تھا۔
انہوں نے کہا کہ ممالک کے درمیان تعلقات دو طرفہ کوششوں پر مبنی ہوتے ہیں اور وزیراعظم عمران خان نے جذبہ خیر سگالی کے تحت نریندر مودی کو مبارک باد دی تھی۔
شاہ محمود قریشی نے کہا کہ حلف برداری کی تقریب میں شرکت کے بجائے مسئلہ کشمیر، سیاچن اور سر کریک کے تنازعات پر بیٹھ کر مذاکرات کے ذریعے حل نکالنا اہم اقدام ہوگا۔
یہ بھی پڑھیں: علاقائی امن و ترقی کو ہمیشہ فوقیت دی، مودی کا عمران خان کو جواب
وزیر خارجہ نے کہا کہ 'مذاکرات کے آغاز کے لیے نیا راستہ تلاش کرنا بھارت کی بھی ضرورت ہے'۔
ان کا کہنا تھا کہ 'اگر مودی اس خطے میں ترقی چاہتے ہیں تو وہ مسائل کے حل کے لیے پاکستان کے ساتھ مذاکرات کریں'۔
شاہ محمود قریشی نے کہا کہ 'کشیدگی کا خاتمہ پاکستان کے مفاد میں ہے، پاکستان نے کشیدگی پیدا نہیں کی تھی، اب پوری دنیا نے بھی یہ حقیقت تسلیم کرلی ہے کہ پلوامہ واقعے میں پاکستان کا کوئی کردار نہیں تھا'۔
سشما سوراج کو استثنیٰ
گزشتہ ہفتے وزیر خارجہ شاہ محمود قریشی اور بھارتی ہم منصب سشما سوراج کے درمیان بشکیک میں شنگھائی تعاون تنظیم کے اجلاس میں غیر رسمی ملاقات ہوئی تھی۔
خیال رہے کہ پلوامہ واقعے کے بعد دونوں وزرائے خارجہ کے درمیان براہ راست پہلی ملاقات تھی۔
بھارتی میڈیا کی رپورٹ کے مطابق اسلام آباد نے شنگھائی تعاون تنظیم کے اجلاس میں شرکت کے لیے سشما سوراج کو پاکستانی فضائی حدود سے گزرنے کے لیے غیر معمولی استثنیٰ دیا تھا۔
پاکستان نے 26 فروری کو بالاکوٹ میں بھارتی دراندازی کے بعد بھارت سے آنے اور جانے والی پروازوں کے لیے فضائی حدود بند کردی تھی۔
ترجمان دفتر خارجہ ڈاکٹر محمد فیصل نے دی ہندو کو بتایا کہ بھارتی حکومت نے طویل روٹ سے بچنے کے لیے سشما سوراج کو پاکستانی حدود سے گزرنے کی اجازت دینے کی درخواست کی تھی اور ہم نے منظور کرلی۔
یہ رپورٹ 28 مئی 2019 کو ڈان اخبار میں شائع ہوئی
لائیو ٹی وی