دنیا بھر میں سیاحت کے لیے معروف متعدد جزائر پر مبنی ملک تھائی لینڈ کے 66 سالہ بادشاہ ماہا وجیرالونگ کورن نے اپنی ہی خاتون سیکیورٹی گارڈ سے اچانک شادی کرکے سب کو حیران کردیا۔

بادشاہ ماہا وجیرالونگ کورن نے خود سے کم سے کم 26 سال کم عمر سیکیورٹی گارڈ سے ایک ایسے موقع پر شادی کی ہے جب کہ ان کی تخت پوشی کی تقریبات کا آغاز ہونے والا تھا۔

ماہا وجیرالونگ کورن کو تھائی لینڈ کا بادشاہ بنے اگرچہ 2 سال سے زائد کا عرصہ گزر چکا ہے، تاہم اب ان کی باضابطہ تخت پوشی کی تقریبات منعقد ہوں گی۔

تھائی لینڈ کے بادشاہ کی تخت پوشی کی تقریبات 4 سے 6 مئی کے درمیان ہوں گی اور وہ باضابطہ طور پر تخت سنبھالیں گے۔

تھائی لینڈ کی شاہی روایات کے مطابق بادشاہ کے وفات پاجانے کے بعد نئے بادشاہ بننے والے شخص سوگ کی وجہ سے کم سے کم 2 سال تک تخت پوشی کی تقریبات منعقد نہیں کرے گا۔

ماہا وجیرالونگ نے دسمبر 2016 میں اپنے والد اور تھائی لینڈ کے سابق بادشاہ بھومبول ایڈیلڈ کی وفات کے بعد تخت سنبھالا تھا اور سوگ کی وجہ سے انہوں نے تخت پوشی کی تقریب منعقد نہیں کی تھی۔

تاہم اب تخت پوشی کی تقریبات شروع ہونے سے قبل ہی انہوں نے اپنی سیکیورٹی گارڈ سے شادی کرکے عوام کو حیران کردیا۔

خبر رساں ادارے ’اے ایف پی‘ نے اپنی رپورٹ میں تھائی لینڈ کے شاہی محل کی جانب سے جاری کردہ بیان کا حوالہ دیتے ہوئے بتایا کہ ماہا وجیرالونگ کورن نے اپنی سیکیورٹی گارڈ سوتھدا ایودھیا سے شادی کرکے انہیں ملکہ کا اعزاز دے دیا۔

شاہی محل کی جانب سے جاری کیے گئے اعلامیے میں کہا گیا ہے کہ بادشاہ ماہا وجیرالونگ کورن نے شادی کے بعد سوتھدا ایودھیا کو ملکہ کا اعزاز دے دیا ہے اور ان کی ذمہ داریوں کا اعلان بعد میں کیا جائےگا۔

رپورٹ میں مقامی میڈیا کا حوالہ دیتے ہوئے بتایا گیا کہ بادشاہ نے اپنی سیکیورٹی گارڈ سے شاہی محل میں ایک تقریب کے دوران شادی کی جس میں شاہی محل کے کئی اعلیٰ عہدیداروں نے شرکت کی۔

شادی روایتی شاہی رسومات کے تحت کی گئی، جس دوران بادشاہ نے ملکہ کے سر پر مقدس پانی ڈالنے سمیت ان کی پیشانی پر مقدس نشان بھی بنایا۔

بعد ازاں انہوں نے ملکہ سے شادی کی قانونی اور کاغذی کارروائی بھی مکمل کی، جس کے بعد انہوں نے ملکہ کو اپنے ساتھ بٹھاکر انہیں شاہی اعزازات سے نوازا۔

شاہی محل کی جانب سے بادشاہ کی شادی کی تفصیلات بتائے جانے کے بعد تھائی لینڈ کے تمام اخبارات و ٹی وی چینلز پر ان کی شادی کے چرچے رہے اور عوام نے خوشی کا اظہار کیا۔

شادی کرنے کے بعد بادشاہ اور ملکہ کو تخت پوشی کی کی جانے والی تقریبات کی تیاری کو دیکھتے ہوئے بھی دیکھا گیا اور اس دوران ملکہ نے روایتی ہلکے گلابی رنگ کے کپڑے پہن رکھے تھے۔

بادشاہ کی ذاتی زندگی

تھائی لینڈ کے بادشاہ کی یہ چوتھی شادی ہے، اس سے قبل وہ تین شادیاں کر چکے ہیں اور ان کے 7 بچے بھی ہیں۔

تھائی لینڈ کے بادشاہ نے پہلی شادی اپنے خاندان کی خاتون سے 1977 میں کی جو کئی سال تک جاری رہی اور جوڑے کے ہاں 1978 میں پہلی بچی کی پیدائش بھی ہوئی۔

بادشاہ کی پہلی شادی 2 دہائیوں بعد 1999 میں طلاق پر ختم ہوئی، جس کے بعد بادشاہ نے ایک اداکارہ سے شادی کی۔

ماہا وجیرالونگ کورن نے دوسری شادی پہلی شادی ختم ہونے سے قبل ہی 1995 میں کرلی تھی اور انہیں دوسری اہلیہ سے 5 بچے ہیں اور ان کی شادی محض 2 سال تک ہی چل سکی۔

تھائی لینڈ کے بادشاہ نے تیسری شادی 2010 میں کی اور انہیں تیسری اہلیہ سے بھی ایک بچہ ہے، تاہم ان کی تیسری شادی بھی 2014 میں طلاق پر ختم ہوئی۔

ماہا وجیرالونگ کورن کی تینوں شادیاں بادشاہ بننے سے قبل ہوئی تھیں۔

ماہا وجیرالونگ کورن کی بطور ولی عہد نہ صرف شادیاں ناکام رہیں بلکہ ان کے دیگر خواتین کے ساتھ تعلقات کے حوالے سے بھی اطلاعات سامنے آتی رہیں۔

اطلاعات ہیں کہ انہوں نے یکم مئی کو جس سیکیورٹی گارڈ خاتون سے شادی کی، انہوں نے اسے اپنے سیکیورٹی عملے میں بادشاہ بننے سے قبل ہی شامل کرلیا تھا۔

بادشاہ کا دل چرانے والی سیکیورٹی گارڈ کون ہے؟

39 سالہ سوتھدا ایودھیا نے بینکاک کی نجی یونیورسٹی سے گریجوئیشن کرنے کے بعد بطور ایئرہوسٹس کیریئر کا آغاز کیا تھا۔

تھائی لینڈ میڈیا کے مطابق 1978 میں پیدا ہونے والی سوتھدا نے آرٹس کمیونی کیشن میں گریجوئیشن کرنے کے بعد تھائی ایئر ویز میں بطور ایئرہوسٹس کیریئر کا آغاز کیا۔

اطلاعات کے مطابق بادشاہ نے سوتھدا کو اپنے سیکیورٹی عملے میں 2012 اور 2014 کے درمیان شامل کیا اور اس وقت وہ ولی عہد تھے۔

بعد ازاں والد کی وفات کے فوری بعد بادشاہ بننے کے بعد انہوں نے سوتھدا کو شاہی رائل آرمی میں بطور میجر ترقی دی۔

رپورٹس کے مطابق شاہی رائل آرمی میں میجر جنرل بننے کے بعد 2017 میں سوتھدا کو بادشاہ کی سیکیورٹی دیکھنے والی کمیٹی کی ڈپٹی کمانڈر بنایا گیا۔

بادشاہ کی سیکیورٹی دیکھنے والی کمیٹی کے کمانڈر خود بادشاہ ہوتے ہیں اور بادشاہ نے سوتھدا کو ہی اپنا ڈپٹی کمانڈر مقرر کیا۔

ڈپٹی کمانڈر مقرر کیے جانے کے بعد بادشاہ اور سوتھدا کو تقریبات میں قریب قریب دیکھا گیا اور ان کے تعلقات کے حوالے سے پہلی بار دبے الفاظوں میں چہ مگوئیاں ہونے لگیں۔

شاہی محل نے یکم مئی کو جاری کردہ بیان میں پہلی بار بادشاہ اور سوتھدا کے تعلقات کو تسلیم کیا گیا۔

بیان میں بتایا گیا کہ بادشاہ نے سوتھدا سے شادی کرنے کے بعد انہیں ملکہ کے اعزاز سے نوازا ہے اور جلد ہی ان کی مصروفیات اور ذمہ داریوں سے متعلق تفصیلات جاری کی جائیں گی۔