مہمند ڈیم کا سنگِ بنیاد رکھ دیا گیا، تعمیر 2024 میں مکمل ہوگی
وزیراعظم عمران خان اور سابق چیف جسٹس میاں ثاقب نثار نے خیبرپختونخوا میں دریائے سوات پر مہمند ڈیم ہائیڈرو پاور منصوبے کا سنگِ بنیاد رکھ دیا۔
اس موقع پر ڈیم کی خصوصیات کے حوالے سے بتایا گیا کہ مہمند ڈیم کی تعمیر سے یومیہ 8 سو میگا واٹ اور سالانہ 28 سو 62 گیگا واٹ بجلی پیدا ہوگی اور اس پر 3 ارب ڈالر لاگت آئے گی جب کہ اس کی تعمیر سال 2024 میں مکمل ہوگی۔
مہند ڈیم میں 12 لاکھ 93 ہزار ایکڑ فٹ پانی ذخیرہ کرنے کی گنجائش ہوگی اور اس آبی ذخیرے سے 16 ہزار 737 ایکڑ رقبہ سیراب کیا جاسکے گا۔
اس کے ساتھ مذکورہ ڈیم کی تعمیر سے سیلاب کے باعث ہونے والے نقصانات پر قابو پانے میں بھی مدد ملے گی۔
مہمند ڈیم کا سنگِ بنیاد رکھنے کے لیے منعقدہ تقریب میں وزیراعظم عمران خان، آرمی چیف جنرل قمر جاوید باجوہ، وزیر برائے آبی وسائل فیصل واڈا، سابق چیف جسٹس ثاقب نثار، عہدیداروں اور مقامی عمائدین نے شرکت کی۔
اگر این آر او دیا تو یہ میری قوم سے غداری ہوگی، وزیراعظم
تقریب کے دوران خطاب کرتے ہوئے وزیراعظم خان نے سابق چیف جسٹس میاں ثاقب نثار کو ڈیم فنڈ کا آغاز کرنے پر خراج تحسین پیش کیا۔
اپنے خطاب کے آغاز میں وزیراعظم نے وزیر آبی وسائل کا ذکر کرتے ہوئے کہا کہ وہ اپنی جارحانہ تقریر میں ڈیم کی بات کرنا ہی بھول گئے اور پوری تقریر کسی اور ہی موضوع پر کردی، اس پر میں صرف اتنا کہنا چاہوں گا کہ باہر سے زیادہ اندر سے خطرہ ہے۔
وزیراعظم عمران خان نے خطاب کرتے ہوئے کہا کہ عدلیہ کا کام نہیں ہے کہ وہ ملک میں ڈیم کی تعمیر کے لیے اقدامات اٹھائے لیکن میاں ثاقب نثار نے حکمرانوں کی عدم توجہ کی وجہ سے یہ اقدامات اٹھائے۔
انہوں نے کہا کہ وزیراعظم پاکستان وادی تیراہ میں گئے جو ایک ایسی وادی ہے جہاں انگریز بھی حکومت نہیں کرسکا اور وہاں اسے شکست کا سامنا کرنا پڑا تھا۔
اس کے ساتھ وزیراعظم نے تیراہ سمیت پورے ضلع خیبر میں امن قائم کرنے پر فوج کو خراجِ تحسین پیش کیا۔
وزیراعظم نے کہا کہ میں نے سب سے زیادہ قبائلی اضلاع کا دورہ کیا ہے اور میں ان کی تمام روایات اور تہذیب کو جانتا ہوں اور جہاں بھی گیا وہاں جاکر اس علاقے کی پسماندگی کے بارے میں یہ معلوم ہوا کہ یہاں، تعلیم، پانی، صحت اور کاروبار موجود نہیں ہے۔
یہ بھی دیکھیں: مہمند ڈیم کی تعمیر سے پاکستان کو کیا فائدہ ہوگا؟
انہوں نے اپنی بات کو جاری رکھتے ہوئے کہا کہ یہ تمام محرومی ڈیم کے نہ ہونے کی وجہ سے ہی ہے، پاکستان 1960 کی دہائی میں ترقی کر رہا تھا اس کی سب سے بڑی وجہ پاکستان میں ڈیم کی تعمیر ہے، اس وقت جنرل (ر) ایوب خان کی حکومت تھی اور انہوں نے مستقبل کا سوچا اور منصوبے شروع کیے۔
ہمارے یہاں لوگ اپنے ووٹ بینک کی وجہ سے صرف اپنے علاقوں میں ترقیاتی کام کراتے ہیں لیکن جن علاقوں میں ان کا ووٹ بینک نہیں ہوتا اس کی وجہ سے پاکستان میں وہ علاقے دیگر علاقوں سے بھی پیچھے رہ گئے۔
انہوں نے لاہور کی مثال دیتے ہوئے کہا کہ اس شہر میں پنجاب کے دیگر شہروں کے مقابلے میں زیادہ ترقیاتی کام ہوئے جس کی وجہ سے آس پاس کے علاقوں میں رہنے والے افراد نے اس علاقے کا رخ کیا جس کی وجہ سے اس شہر کی آبادی زیادہ ہوگئی اور یہ شہر بد انتظامی کا شکار ہوگیا۔
وزیراعظم نے کہا کہ حکومت نے فیصلہ کیا ہے کہ ساڑھے 4 ارب روپے صرف ضلع مہمند میں خرچ کیے جائیں گے جبکہ ڈیم کی تعمیر سے مقامی افراد کو ملازمتیں بھی فراہم کی جائیں گی۔
انہوں نے کہا مسلمانوں کی تاریخ کی سب سے بہترین مثال مدینہ کی ریاست تھی جس پر مغرب نے فلاحی ریاست کی بنیاد رکھی اور بیواؤں، یتمیوں اور ضعیفوں کا خیال رکھنا سب سے پہلے مدینہ کی ریاست میں شروع ہوا۔
یہ بھی پڑھیں: ڈیم فنڈمیں جمع رقم سے سرمایہ کاری کیلئے اسٹیٹ بینک سے تجاویز طلب
ان کا کہنا تھا کہ ہمیں کمزور طبقے کو ترقی دینی ہے اور ملک میں جہاں قدرتی وسائل موجود ہیں ان علاقوں کو ترقی دینی چاہیے۔
وزیراعظم نے مزید کہا کہ ہمیں احساس ہے کہ یہاں کہ لوگوں کے مسائل کیا ہیں؟ ہم انہیں دور کریں گے اور آپ کے لیے نوکریاں، معاشی مواقع، جدید ٹیکنالوجی اور تعلیم کی سہولیات فراہم کریں گے۔
این ایف سی میں فاٹا کے لیے 3 فیصد مختص کرنے کے حوالے سے وزیراعظم نے کہا کہ اس وقت تمام صوبوں کو جنگ کے باعث تباہ حال قبائلی علاقوں کو ترقی دینے کے لیے مدد کرنی چاہیے۔
وزیراعظم نے کہا کہ قبائلی اضلاع میں غیر ملکی عناصر کی فنڈنگ سے پروپیگنڈا ہورہا ہے، اگر ان علاقوں میں نوجوانوں کی مدد نہ کی گئی تو ملک میں انتشار پیدا ہوگا جس کے باعث نقصان اور قربانیاں دینے کے ساتھ ساتھ ملک کا خرچہ بھی بہت ہوگا۔
انہوں نے بتایا کہ چین میں کئی ہزار ڈیم ہیں اور ہمیں بھی ان کی ٹیکنالوجی سے فائدہ اٹھانا چاہیے، ہمیں 5 سال میں 50 لاکھ گھر بھی بنانے ہیں اور اب چینی کمپنی نے ایسی ٹیکنالوجی متعارف کروائی ہے جس سے ایک ہفتے میں ایک منزل تعمیر کرلی جائے گی۔
وزیراعظم کا کہنا تھا کہ ہمیں کسی ایک علاقے یا شہر کو ترقی نہیں دینی بلکہ پورے ملک کو ترقی دینی ہے اور بالخصوص ہم قبائلی علاقوں پر سب سے زیادہ توجہ دیں گے جو زبوں حالی کا شکار ہے۔
مزید پڑھیں: فنڈز جمع کرنے کا مقصد ڈیم کی تعمیر نہیں آگہی تھی، سابق چیف جسٹس
انہوں نے ایک مرتبہ پھر کرپشن کے حوالے سے بات کرتے ہوئے کہا کہ کبھی عام آدمی کی چوری سے ملک تباہ نہیں ہوتا بلکہ ملک کا سربراہ چوری کرتا ہے جو تمام اداروں کو تباہی کا شکار کردیتا ہے۔
اس کے ساتھ انہوں نے ایک مرتبہ پھر اپنا موقف دہراتے ہوئے کہا کہ اگر میں نے انہیں این آر او دیا تو یہ میری اپنی قوم سے غداری اور اللہ سے بے وفائی ہوگی۔
اپنا فرض ادا کیا کوئی احسان نہیں کیا، سابق چیف جسٹس
وزیراعظم سے قبل سابق چیف جسٹس ثاقب نثار نے اپنے خطاب میں ڈیم کے لیے زمین فراہم کرنے پر مقامی افراد کا شکریہ ادا کرتے ہوئے کہا کہ عطیات اپنی جگہ لیکن ڈیم کے لیے اپنی زمین دینے سے بڑی قربانی کوئی نہیں۔
یہ بھی پڑھیں: مہمند ڈیم کا ٹھیکہ ڈیسکون اور چینی کمپنی کو دے دیا گیا
انہوں نے کہا کہ ڈیم کی تعمیر میں سب سے اہم چیز شفافیت ہے جس کے لیے ایسا طریقہ کار ہونا چاہیے کہ عوام کو وقتاً فوقتاً ڈیم پر آنے والے اخراجات سے آگاہ کیا جاتا رہے۔
انہوں نے کہا کہ ڈیم کے حوالے سے کی گئی کوششیں سپریم کورٹ کا احسان نہیں بلکہ ہمارا فریضہ ہے، اس کے ساتھ انہوں نے ڈیم فنڈ میں عطیات دینے پر بیرونِ ملک مقیم پاکستانیوں کو خوب سراہا۔
10 رمضان تک 400 نوکریاں دے دیں گے، وزیر آبی ذخائر
تقریب سے خطاب کرتے ہوئے وفاقی وزیر برائے آبی وسائل نے اعلان کیا کہ 10 رمضان تک وہ اپنی اور اپنے دوستوں کی جیب سے نوکریاں فراہم کریں گے اور اس کا آغاز کرتے ہوئے کراچی میں اپنے انتخابی حلقے بلدیہ میں 2 سو سے 4 سو نوکریاں اور کاروبار مہیا کریں گے جس کے بعد اس کو باقی ملک میں پھیلایا جائے گا۔
ان کا کہنا تھا کہ کرپشن کرنے والے آج ہمیں درس دے رہے ہیں کہ ہمیں حکومت کس طرح چلانی ہیں۔
وفاقی وزیر کا کہنا تھا کہ میرے سامنے جس کا گھر تھا وہ آج کرپشن کا بادشاہ ہے، جس کی لندن کے سڑکوں پر بیٹھے ہوئے تصویریں نظر آتی ہیں۔
یہ بھی پڑھیں: پاکستان نئے ڈیم نہ بنا کر کیا قیمت چکا رہا ہے؟
انہوں نے جوش خطابت میں دعویٰ کیا کہ ہم نے کراچی کے غنڈے کی آواز بند کی اور سندھ کو تباہ کرنے والوں کا راستہ روکا اور پنجاب کے ڈاکوؤں کو گرفت میں لائے۔
فیصل واڈا نے شریف خاندان کو ٹی ٹی خاندان کہتے ہوئے کہا کہ اس خاندان کا ہر فرد کرپشن کے باعث مفرور ہے اور پھر ہماری حکومت کو کہا جاتا ہے کہ مہنگائی ہورہی ہے۔
انہوں نے کہا کہ عوام نے وزیراعظم کو ووٹ اس لیے دیے کہ کرپشن کرنے والوں کو پکڑا جائے اس کے لیے ہم آج بھی قربانیاں دینے کے لیے تیار ہیں۔
ان کا کہنا تھا کہ میرے پیچھے پوری اپوزیشن لگی ہوئی ہے، یہ قوم غیور قوم ہے جو بھی کرنا چاہیں کریں لیکن احتساب ختم نہیں کریں گے۔
وفاقی وزیر نے کہا کہ ہمیں داسو ڈیم کی وجہ سے 36 کروڑ روپے روزانہ نقصان ہورہا ہے جسے دور کرتے ہوئے ہم بہت جلد اس کا بھی افتتاح کریں گے۔
لائیو ٹی وی