مائیکرو بلاگنگ سوشل ویب سائٹ ٹوئٹر پر یوں تو سب سے زیادہ مقبول شخصیت کا اعزاز امریکی گلوکارہ کیٹی پیری کو حاصل ہے۔

تاہم اعداد و شمار جاری کرنے والے برطانوی ادارے ’دی اسپیکٹر انڈیکس‘ کی تازہ رپورٹ کے مطابق گزشتہ کچھ عرصے میں ریاستوں و ممالک کے حکمرانوں و سربراہوں کی مقبولیت میں اضافہ دیکھا گیا۔

ادارے نے حکمرانوں اور سربراہوں کی مقبولیت کا اندازہ ٹوئٹر پر ان کے بڑھتے فالوورز سے لگایا اور ادارے نے سب سے زیادہ فالو کیے جانے والے 12 عالمی رہنماؤں کی فہرست جاری کردی۔

فہرست کے مطابق ٹوئٹر پر سب سے زیادہ مقبول حکمران امریکی صدر ڈونلڈ ٹرمپ ہیں، جن کے فالوورز کی تعداد تقریبا 6 کروڑ ہے۔

فہرست کے مطابق پاکستانی وزیر اعظم عمران خان نے ٹوئٹر پر فالوورز کی تعداد میں سعودی عرب کے شہزادے محمد بن سلمان کو بھی پیچھے چھوڑ دیا۔

عمران خان نے نہ صرف سعودی شہزادے بلکہ برطانوی وزیر اعظم کے آفیشل ٹوئٹر ہینڈل اور فرانسیسی صدر ایمانوئیل میکرون کو بھی فالووز میں پیچھے چھوڑ دیا۔

یوں عمران خان جہاں ٹوئٹر فالوورز میں کئی عالمی رہنماؤں سے آگے ہیں، وہیں وہ پاکستان کی پہلی سیاسی شخصیت ہیں جن کے فالوورز ایک کروڑ کے قریب ہیں۔

سب سے زیادہ فالوؤرز رکھنے والے حالیہ حکمران

ڈونلڈ ٹرمپ (امریکی صدر) 5 کروڑ 95 لاکھ

نریندر مودی (بھارتی وزیر اعظم) 4 کروڑ 67 لاکھ

پوپ فرانسس (مسیحیوں کے روحانی پیشوا) ایک کروڑ 79 لاکھ

رجب طیب اردوان (ترک صدر) ایک کروڑ 36 لاکھ

سشما سوراج (بھارتی وزیر خارجہ) ایک کروڑ 24 لاکھ

جوکو ودودو (انڈونیشیائی صدر) ایک کروڑ 11 لاکھ

شہزادی رانیا (اردن کی شہزادی) ایک کروڑ 40 لاکھ

محمد بن راشد المکتوم (دبئی کے امیر) 96 لاکھ

عمران خان (وزیر اعظم پاکستان) 94 لاکھ

محمد بن سلمان (ولی عہد سعودی عرب) 73 لاکھ

ٹین ڈاؤننگ اسٹریٹ (برطانوی وزیر اعظم کا آفیشل اکاؤنٹ) 54 لاکھ

ایمانوئل میکروں (فرانسیسی صدر) 37 لاکھ

پاکستان میں دوسرے نمبر پر مریم نواز ہیں جن کے فالوورز کی تعداد 50 لاکھ سے زائد ہے۔

پاکستان میں تیسرے نمبر پر پاکستان پیپلز پارٹی کے چیئرمین بلاول بھٹو زرداری ہیں جن کے فالورز کی تعداد 32 لاکھ سے زائد ہے۔