سرفراز احمد نے فوجی وردی پہن کر پی ایس ایل کی فتح کا جشن منایا
پاکستان سپر لیگ کی فرنچائز کوئٹہ گلیڈی ایٹرز کو چیمپیئن بنوانے والے قومی ٹیم کے کپتان سرفراز احمد نے اپنی ٹیم کی فتح کا جشن فوجی وردی پہن کر منایا۔
17مارچ کو کراچی کے نیشنل اسٹیڈیم میں کھیلے گئے پاکستان سپر لیگ کے چوتھے ایڈیشن کے فائنل میں گلیڈی ایٹرز نے پشاور زلمی کو شکست دے کر پہلی مرتبہ چیمپیئن بننے کا اعزاز حاصل کیا تھا۔
اپنی ٹیم کی فتح کا جشن منانے کے لیے کوئٹہ گلیڈی ایٹرز کی ٹیم ہفتے کو بلوچستان کے دارالحکومت کوئٹہ پہنچی تھی جہاں انہوں نے عوام کے ہمراہ اپنا جشن منایا۔
یہ بھی پڑھیں: پی ایس ایل چیمپیئن کا کوئٹہ میں پرتپاک استقبال
ٹیم کا کوئٹہ ایئرپورٹ پر پرتپاک استقبال کیا گیا تھا اور بلوچستان حکومت کی جانب سے ان کے اعزاز میں تقریب کا بھی اہتمام کیا گیا تھا۔
اس موقع پر پرجوش عوام نے ٹیم کے حق میں نعرے بازی کرتے ہوئے ان پر پھولوں کی پتیاں بھی نچھاور کیں۔
کوئٹہ گلیڈی ایٹرز نے اپنے ٹوئٹر اکاؤنٹ پر اس تقریب کی تصاویر شیئر کی تھیں جس میں سرفراز کو فوجی وردی میں ملبوس دکھایا گیا تھا جبکہ ان کے ساتھ کمانڈر سدرن کمانڈ لیفٹیننٹ جنرل عاصم باجوہ اور وزیر اعلیٰ بلوچستان جام کمال خان سمیت دیگر افراد بھی موجود تھے۔
لائیو ٹی وی