کے الیکٹرک کے بورڈ آف ڈائریکٹرز نے اکرام سہگل کو بورڈ کانیا چیئرمین منتخب کر لیا۔

کے الیکٹرک کی جانب سے جاری بیان کے مطابق اکرام سہگل کو سابق چیئرمین طیب ترین کی جگہ چیئرمین بنایا گیا ہے، جنہیں گزشتہ سال جون میں یہ ذمہ داری سونپی گئی تھی لیکن آج وہ اپنے عہدے سے مستعفی ہو گئے۔

اس سے قبل طیب ترین نے نومبر 2014 سے جون 2018 تک کے الیکٹرک کے چیف ایگزیکٹو افسر (سی ای او) کی حیثیت سے فرائض انجام دیے اور 2009 سے ادارے کے بورڈ آف ڈائریکٹرز میں شامل ہو کر کمپنی کے چیف فنانشل افسر اور چیف اسٹریٹیجیک افسر کے عہدے پر بھی فائز رہے۔

طیّب ترین بنیادی طور پر کثیر الجہتی اداروں میں کاروباری منفعت، مالیاتی انتظام، منصوبہ بندی اور کاروباری معاہدوں کے شعبوں میں 24 سال سے زائد کا تجربہ رکھتے ہیں اور انہوں نے متحدہ عرب امارات اور عمّان سمیت دنیا کے مختلف ملکوں میں کوکا کولا سمیت بڑی کمپنیوں میں کام کرتے ہوئے انہیں مستحکم و نفع بخش کمپنی بنایا۔

کے الیکٹرک کے بورڈ آف ڈائریکٹرز نے کمپنی کے شاندار خدمات اور تعمیراتی کردار ادا کرنے پر طیب ترین کو خراج تحسین پیش کیا۔

40 سال سے زائد کاروباری تجربے کے حامل نئے چیئرمین اکرام سہگل پاک فوج میں خدمات انجام دے چکے ہیں، بعد ازاں انہوں نے 1977 میں اپنا کاروبار شروع کیا۔

وہ بینک الفلاح کے بورڈ میں 16 سال تک خدمات انجام دینے کے ساتھ ساتھ عالمی اقتصادی فورم کے بانی رکن اور امریکا کے ایسٹ ویسٹ انسٹی ٹیوٹ میں 9 سال تک فرائض انجام دینے کے ساتھ دیگر بڑے اداروں میں بھی کام کا وسیع تجربہ رکھتے ہیں۔

بورڈ آف ڈائریکٹرز نے امید ظاہر کی کہ اکرام سہگل اپنی بیش بہا معلومات اور وسیع تجربے کی بدولت کمپنی کو نئی بلندیوں تک پہنچانے میں کردار ادا کریں گے۔