ایف سی پر حملہ: پاکستان کا احتجاج، ایرانی سفیر طلب
اسلام آباد: ایرانی سفیر مہدی ہنر دوست کو دفتر خارجہ طلب کرکے پاک-ایران سرحد کے قریب فرنٹیئر کور (ایف سی) کی پیٹرولنگ ٹیم کی گاڑی پر حملے پر احتجاجی مراسلہ دے دیا گیا۔
دفتر خارجہ کی جانب سے جاری ہونے والے بیان میں کہا گیا کہ ’پاکستان کے لیے ایرانی سفیر کو افسوسناک سانحے پر احتجاج ریکارڈ کرانے کے لیے دفتر خارجہ طلب کیا گیا‘۔
ان کا کہنا تھا کہ ایران کی حکومت سے حملے میں ملوث دہشت گرد تنظیم کے خلاف موثر کارروائی کرنے کا بھی کہا گیا۔
مزید پڑھیں: افغانستان نے 5 ایف سی اہلکاروں کی لاشیں پاکستان کے حوالے کردیں
واضح رہے کہ جمعے کے روز واکائی خطے میں فرنٹیئر کور کے وفد پر دہشت گردوں نے حملہ کیا تھا جس کے نتیجے میں 6 فوجی شہید ہوئے تھے۔
پاک فوج کے شعبہ تعلقات عامہ نے اپنے بیان میں کہا تھا کہ دہشت گردوں نے خفیہ اطلاعات پر تربت میں بلیدہ کے قریب واکائی کے علاقے میں دہشت گردوں کے ٹھکانوں پر آپریشن کے دوران ایف سی کی گاڑی کو آئی ای ڈی بم سے نشانہ بنایا تھا۔
یہ بھی پڑھیں: کوئٹہ: ایف سی کی چیک پوسٹ میں دھماکا، 6 زخمی
حملے میں دیگر 14 فوجی زخمی ہوئے تھے۔
واضح رہے کہ اس حملے سے ایک روز قبل پاکستان اور ایران کے درمیان سرحدی سیکیورٹی بہتر بنانے اور تیل کی مصنوعات، منشیات، اسلحہ اور انسانوں کی اسمگلنگ کی روک تھام کے لیے یادداشت پر دستخط کیے گئے تھے۔
وزیر اعظم عمران خان نے اپنے بیان میں دہشت گردی کے واقعے کی مذمت بھی کی تھی۔
یہ خبر ڈان اخبار میں 16 دسمبر 2018 کو شائع ہوئی
لائیو ٹی وی