پریانکا چوپڑا سے شادی کے لیے نک جونس کی بھارت آمد
اگرچہ تاحال بولی وڈ میں دپیکا پڈوکون اور رنویر سنگھ کی شادی کی دعوتوں کا سلسلہ جاری ہے، تاہم دوسری جانب پریانکا چوپڑا اور نک جونس کی شادی کی تیاریاں بھی جاری ہیں۔
اگرچہ نک جونس اور پریانکا چوپڑا نے شادی کے لیے تاریخ کا اعلان نہیں کیا، تاہم رپورٹس ہیں کہ ان کی شادی کی تقریبات رواں ماہ 29 نومبر سے شروع ہوجائیں گی۔
اطلاعات ہیں کہ نک اور پریانکا کی شادی کی مرکزی تقریبات 2 اور 3 دسمبر کے درمیان بھارتی ریاست راجستھان میں ہوں گی، تاہم اس حوالے سے جوڑے نے کوئی وضاحت نہیں کی۔
بھارتی میڈیا کے مطابق دونوں کی شادی راجستھان کے دارالحکومت جودھپور کے تاریخی ہوٹل امید بھگوان پیلس میں ہو گی، جہاں دونوں کے خاندان کے افراد سمیت انتہائی قریبی دوست شامل ہوں گے۔
لیکن نک اور پریانکا نے تاحال اپنی شادی کی تاریخ سمیت شادی کی جگہ کا بھی اعلان نہیں کیا۔
یہ بھی پڑھیں: پریانکا کا شادی پر دپیکا سے زیادہ دولت لٹانے کا منصوبہ؟
تاہم نک جونس اب بھارت پہنچ گئے ہیں، جس کے بعد یہ خیال کیا جا رہا ہے کہ جلد ہی ان کی شادی کی تقریبات کا آغاز ہوگا۔
ڈی این اے انڈیا نے اپنی رپورٹ میں بتایا کہ 26 سالہ امریکی گلوکار نک جونس 25 نومبر کی صبح ممبئی پہنچے، ان کے ساتھ پریانکا چوپڑا بھی تھیں۔
دونوں کو انتہائی سخت سیکیورٹی اور خاموشی سے گھر جاتے ہوئے دیکھا گیا، انہوں نے میڈیا سے شادی کے حوالے سے کوئی بات نہیں کی۔
ممبئی پہنچنے سے قبل دونوں نئی دہلی میں موجود تھے، جہاں نک جونس 2 روز قبل پہنچے تھے اور پریانکا چوپڑا نے ان کی بھارت آمد پر انہیں خوش آمدید کرتے ہوئے ان کے ساتھ اپنی ایک تصویر شیئر کی تھی۔
اطلاعات ہیں کہ دونوں شادی کی رسومات کے لیے 29 نومبر تک جودھپور روانہ ہوجائیں گے، جہاں ان کی شادی ہو گی۔
مزید پڑھیں: دپیکا کی طرح پریانکا نے بھی 2 شادیاں کرنے کا منصوبہ بنا لیا
بھارتی میڈیا رپورٹس کے مطابق دونوں دپیکا پڈوکون اور رنویر سنگھ کی طرح 2 شادیاں کریں گے۔
پریانکا اور نک ہندو اور عیسائی مذہبی رسومات کے تحت شادی کریں گے۔
ابھی یہ واضح نہیں ہے کہ جوڑا شادی کے فوری بعد امریکا روانہ ہوجائے گا، یا پھر کچھ دن یہیں بھارت میں قیام کرے گا۔
لائیو ٹی وی