دپیکا اور رنویر دو شادیاں کریں گے

انٹرٹینمنٹ ڈیسک شائع October 24, 2018

ان دونوں نے سوشل میڈیا پر شادی کی تاریخ کا اعلان کیا تھا —فوٹو/ اسکرین شاٹ

بولی وڈ اداکار رنویر سنگھ اور اداکارہ دپیکا پڈوکون رواں سال شادی کے بندھن میں بندھنے جارہے ہیں۔

ان دونوں کی شادی کی تقریبات کا آغاز رواں سال 13 نومبر سے اٹلی میں ہوگا جبکہ بعدازاں یہ دونوں بھارت میں اپنے بولی وڈ ساتھیوں کے لیے بھی دو ایونٹ منعقد کریں گے۔

رپورٹ کے مطابق دپیکا پڈوکون اور رنویر سنگھ کے سنگیت کی تقریب 13 نومبر کو منعقد ہوگی، جس کے بعد 14 اور 15 نومبر کو ان دونوں کی شادی کے ایونٹس رکھیں جائیں گے۔

رپورٹ میں مزید بتایا گیا کہ دپیکا اور رنویر دونوں دو روایات کے تحت دو مرتبہ شادی کے بندھن میں بندھیں گے۔

یہ دونوں جنوبی بھارت اور شمالی بھارت کی روایات سے دو مرتبہ شادی کرنے کا ارادہ رکھتے ہیں۔

14 نومبر کو کناڈیگا اسٹائل کی شادی منعقد ہوگی، جبکہ 15 نومبر کو اننت کارج روایت کے تحت شادی منعقد کی جائے گی۔

یاد رہے کہ رنویر سنگھ کا تعلق سندھی پنجابی نسل سے ہے اور یہی وجہ ہے کہ ان دونوں کی شادی میں دپیکا اور رنویر دونوں کے خاندان کی جانب سے فالو کی جانے والی رسومات ادا کی جائیں گی۔

واضح رہے کہ رنویر اور دپیکا کی شادی میں صرف ان کے قریبی دوست اور خاندان کے افراد شریک ہوں گے، جبکہ یہاں آنے والوں کو فون ساتھ نہ لانے کی بھی درخواست کی جائے گی۔

یہ بھی پڑھیں: دپیکا اور رنویر کی شادی میں موبائل فونز لانا ممنوع

رپورٹس کے مطابق دپیکا پڈوکون اور رنویر سنگھ کی شادی میں بولی وڈ سے تعلق رکھنے والے صرف 4 افراد شریک ہوں گے جن میں شاہ رخ خان، فرح خان، سنجے لیلا بھنسالی اور ادیتیا چوپڑا شامل ہیں۔

دپیکا پڈوکون نے اپنے کیریئر کا آغاز فرح خان کی فلم ’اوم شانتی اوم‘ کے ساتھ کیا تھا جس میں شاہ رخ خان نے ان کے ہمراہ مرکزی کردار ادا کیا تھا اور یہی وجہ ہے کہ دپیکا ان دونوں سے کافی قریب ہیں۔

جبکہ رنویر سنگھ کو بولی وڈ میں ادیتیا چوپڑا نے لانچ کیا تھا۔

دوسری جانب سنجے لیلا بھنسالی نے دپیکا اور رنویر سنگھ کو تین کامیاب بولی وڈ فلموں میں کاسٹ کیا۔