بولی وڈ ہیرو کی اہلیہ بریسٹ کینسر کا شکار
رواں برس جولائی میں بولی وڈ اداکارہ سونالی باندرے نے سوشل میڈیا پوسٹ کے ذریعے یہ انکشاف کیا تھا کہ وہ کینسر کا شکار ہوگئی ہیں۔
سونالی باندرے سے قبل بولی وڈ ہیرو عرفان خان نے بھی سوشل میڈیا کے ذریعے انکشاف کیا تھا کہ وہ بہت بڑی بیماری کا شکار ہوگئی ہیں۔ بعد ازاں ان میں بھی نیورو اینڈو کرائن نامی کینسر کی تشخص ہوئی تھی۔
ابھی عرفان اور سونالی باندرے کا درد لوگ بھولے ہی نہیں تھے کہ ایک اور بھارتی فلم لکھاری اور ہیرو آیوشمن کھرانہ کی اہلیہ طاہرہ کشیپ نے یہ انکشاف کردیا کہ وہ بھی کینسر کا شکار ہوچکی ہیں۔
آنے والی رومانٹک کامیڈٰی فلم ‘بدھائی ہو’ کے ہیرو آیوشمن کھرانہ کی اہلیہ 35 طاہرہ کشیپ جو پیشے کے اعتبار سے لکھاری ہیں، انہوں نے بھی سوشل میڈیا کے ذریعے مداحوں کو بتایا کہ وہ بریسٹ کینسر کا شکار ہوچکی ہیں۔
طاہرہ کشیپ نے اپنی انسٹاگرام پوسٹ کے ذریعے بتایا کہ کینسر سے ان کا دایاں ‘بریسٹ’ متاثر ہوا ہے اور انہوں نے ‘میسٹیکٹمی’ کروائی ہے۔
طاہرہ کشیپ نے بتایا کہ ان میں ‘ڈکٹل کارنوما انسیٹو’ (ڈی سی آئی ایس) نامی وائرس کی تشخیص ہوئی، جس کا مطلب یہ ہوا کہ وہ ہولی وڈ اداکارہ انجلینا جولی کا آدھا بھارتی ورژن ہیں۔
انہوں نے اپنی پوسٹ میں مذاق بھی کیے اور خواتین کو مشورہ دیا کہ وہ اپنی صحت کا خٰیال رکھیں۔
طاہرہ کشیپ نے بتایا کہ ان کی عمر 35 برس ہوچکی ہے اور انہوں نے یہ پوسٹ لوگوں میں شعور بیدار کرنے کے لیے رکھی ہے، ممکن ہے کہ ان کی تصویر سے کچھ لوگوں کو تکلیف پہنچی ہو، تاہم اب یہ حقیقت ہے۔
خیال رہے کہ ‘میسٹیکٹمی’ میں بریسٹ کو ہٹادیا جاتا ہے یا پھر انہیں مختصر کرکے کینسر کو مزید پھیلنے سے روکا جاتا ہے۔
انجلینا جولی کو بھی 2013 میں بریسٹ کینسر ہوا تھا اور ان کے دونوں بریسٹ کو ہٹا دیا تھا، بعد ازاں اداکارہ کو ‘اوویرین کینسر’ بھی لاحق ہوگیا تھا اور انہوں نے اس کی سرجری کرا رکھی ہے۔
انجلینا جولی کی والدہ اور دادی بریسٹ اور اوویرین کینسر سے ہی ہلاک ہوئی تھیں۔
طاہرہ کشیپ کے بھی ایک بریسٹ کو ہٹایا یا مختصر کیا گیا ہے۔
طاہرہ کشیپ نے 2011 میں آیوشمن کھرانہ سے شادی کی تھی، اس سے قبل وہ کئی سال سے ایک دوسرے سے ملتے آ رہے تھے۔
طاہرہ اور آیوشمن کھرانہ کو 2 بچے بھی ہیں، طاہرہ نے ایک کتاب بھی لکھی ہے، جب کہ انہوں نے ایک شارٹ فلم ‘ٹافی’ کو بھی بنایا ہے۔
ان کے شوہر آیوشمن کھرانہ ان دنوں اپنی آنے والی فلم ‘بدھائی ہو’ کی تشہیر میں مصروف ہیں، اس فلم میں وہ ثانیہ ملہوترا کے ساتھ کام کرتے دکھائی دیں گے۔
لائیو ٹی وی