گلگت بلتستان سیاحت کیلئے بہترین مقام ہے، جرمن سفیر
پاکستان میں تعینات جرمنی کے سفیر مارٹن کوبلر نے گلگت میں ہونے والے شندور میلے اور پولو فیسٹیول کو سیاحت کا زبردست مقام اور بہترین تقریب قرار دے دیا۔
جرمنی کے سفیر مارٹن کوبلر نے سماجی رابطے کی ویب سائٹ پر اپنے شندور میلے کی تصاویر شائع کیں اور کہا کہ انہوں نے ایسا بہترین میلہ کبھی نہیں دیکھا۔
ان کے ہمراہ جرمن نمائندہ براۓ امور نوجوانان ماریئن فیننگز بھی موجود تھیں۔
مارٹن کوبلر نے اپنے پیغام میں شندور میلے اور گلگت بلتستان کے حوالے سے کہا کہ یہاں شاندار اور خوبصورت نظارے موجود ہیں اور یہاں کا ماحول بھی شاندار ہے۔
ان کا مزید کہنا تھا کہ پاکستان کا شمالی علاقہ سیاحت کے لیے بہت زبردست مقام ہے۔
اس دوران جرمن سفیر نے میلے میں لگائے گئے کھانوں کے اسٹال کا بھی دورہ کیا وہاں موجود کھانوں سے بھی محظوظ ہوئے۔
ایک اسٹال پر فالودہ کھاتے ہوئے ان کا کہنا تھا کہ انہیں پاکستان میں دوروں کے دوران مختلف مقامات پر رکنا اور مقامی کھانے کھانے کا شوق ہے۔
اپنے پیغام میں انہوں نے سوال کیا کہ آپ کو کھانے میں کیا پسند ہے؟
خیال رہے کہ جرمن سفیر مارٹن کوبلر پاکستان میں موجود سفرا میں ایک خاص حیثیت رکھتے ہیں اور عوامی مقامات کا دورہ بھی کرتے رہتے ہیں۔
اس کے علاوہ وہ سماجی رابطوں کی ویب سائٹ پر اپنے پیغامات انگریزی زبان کے ساتھ ساتھ اردو زبان میں بھی جاری کرتے ہیں۔
لائیو ٹی وی