شہباز شریف، حمزہ شہباز اور سعد رفیق کے بعد متعدد اُمیدواروں کا 2 شادیوں کا اعتراف
لاہور: مسلم لیگ (ن) کے رہنماؤں شہباز شریف، حمزہ شہباز اور خواجہ سعد رفیق کے بعد انتخابات 2018 کے لیے کاغذات نامزدگی جمع کرانے والے دیگر سیاسی جماعتوں کے نامور سیاست دانوں نے الیکشن کمیشن میں جمع کرائی گئی اپنی دستاویزات میں ایک سے زائد شادیوں کا اعتراف کرلیا۔
الیکشن کمیشن آف پاکستان سے حاصل دستاویزات کے مطابق مسلم لیگ (ن) کے رہنما رانا مبشر اقبال کی 2 بیویاں ہیں، جن کے نام شازیہ مبشر اور نائلہ مبشر ہیں، اسی طرح پاکستان تحریک انصاف (پی ٹی آئی) کے رہنما جمشید اقبال چیمہ کی 2 بیویاں ہیں، جن میں مسرت جمشید اور نسیم چیمہ شامل ہیں۔
الیکشن کمیشن میں جمع کرائی گئیں دستاویزات کے مطابق پاکستان پیپلز پارٹی (پی پی پی) کے زبیر کاردار کی بھی 2 بیویاں ہیں، جن کے نام صبا زبیر اور ناہید اختر ہیں، علاوہ ازیں تحریک لبیک پاکستان کے رہنما ڈاکٹر آصف اشرف جلالی کی بھی 2 بیویاں ہیں، جن کے نام نصرت بی بی اور طاہرہ حبیب ہیں۔
خیال رہے کہ سابق وزیراعلیٰ پنجاب اور مسلم لیگ (ن) کے صدر میاں محمد شہبازشریف نے کاغذات نامزدگی میں 2 شادیاں ظاہر کی ہیں، شہباز شریف کے مطابق تہمنہ درانی اور نصرت شہباز ان کی اہلیہ ہیں۔
اپنے والد کی طرح حمزہ شہباز نے بھی الیکشن کمیشن میں جمع کرائی گئی دستاویزات میں 2 شادیاں کرنے کا اعتراف کیا اور ان کی اہلیہ میں رابعہ شہباز اور مہرو النساء حمزہ شامل ہیں۔
رپورٹ: رانا بلال
لائیو ٹی وی