کراچی میں رواں ہفتے ایک مدرسے کے استاد کے ہاتھوں تشدد سے بچے کی ہلاکت کے واقعے پر ضلعی و سیشن عدالت نے مقدمے کی سماعت کرتے ہوئے مبینہ ملزم کو 3 روزہ جسمانی ریمانڈ پر پولیس کے حوالے کردیا۔

خیال رہے کہ 21 جنوری کو بن قاسم ٹاؤن میں واقع ایک مدرسے کے استاد قاری نجم الدین نے 8 سالہ بچے کو مبینہ طور پر تشدد کو نشانہ بنا کر قتل کردیا تھا۔

مزید پڑھیں: قاری کے ’تشدد سے بچے کی ہلاکت‘: والدین نے معاف کردیا

قتل ہونے والے 8 سالہ حسین کے والدین نے گزشتہ روز مدرسے کے استاد کو معاف کرتے ہوئے بچے کی لاش کا پوسٹ مارٹم کرنے سے انکار کردیا تھا۔

معافی کے باوجود پولیس نے ملزم کے خلاف ریاست کی مدعیت میں پاکستان پینل کوڈ کی دفعہ 322 کے تحت مقدمہ درج کرکے کارروائی کو آگے بڑھانے کا اعلان کیا تھا۔

یہ بھی پڑھیں: استاد اور شاگرد کا احترام اور شفقت سے بھرپور رشتہ اب تاریخ بن گیا

واضح رہے کہ فروری 2017 میں صوبائی اسمبلی سے منظور ہونے والے قانون کے مطابق سندھ میں ’جسمانی سزا‘ دینے کی ممانعت ہے۔

مذکورہ قانون بچوں کو تعلیمی اداروں میں کسی بھی طرح کے جسمانی تشدد اور اذیت سے تحفظ فراہم کرتا ہے۔