دوسرے ٹیسٹ میچ میں حسن علی کی شرکت مشکوک
سری لنکا کے خلاف پہلے ٹیسٹ میچ میں شکست کے ساتھ ہی قومی ٹیم کو ایک اور بڑا دھچکا لگا ہے اور فاسٹ باؤلر حسن علی کی انجری کے سبب دوسرے ٹیسٹ میچ میں شرکت مشکوک ہو گئی ہے۔
ابوظہبی میں کھیلے گئے پہلے ٹیسٹ میچ میں رنگنا ہیراتھ کی شاندار باؤلنگ کے سبب پاکستان کو میچ میں 21 رنز سے شکست کا سامنا کرنا پڑا۔
دونوں ٹیموں کے درمیان چھ اکتوبر سے دوسرا ٹیسٹ میچ دبئی میں کھیلا جائے گا اور دوسرے ٹیسٹ میچ میں انجری کا شکار حسن علی کی شرکت مشکوک ہے۔
حسن علی پہلے ٹیسٹ میچ میں کمر کی تکلیف کا شکار ہوئے تھے اور ممکنہ طور پر دوسرے ٹیسٹ میچ میں شرکت نہیں کر سکیں گے۔
دوسرے ٹیسٹ کیلئے حسن کی جگہ وہاب ریاض کو ٹیم میں شامل کیے جانے کا امکان ہے کیونکہ دوسرا ٹیسٹ میچ ڈے ائٹ ہو گا اور پاکستانی ٹیم ایک مرتبہ صرف ایک ریگولر اسپنر کے ساتھ میدان میں اترے گی۔
ڈے نائٹ میچ کے سبب قومی ٹیم تین فاسٹ باؤلرز اور یاسر شاہ کے کمبی نیشن کے ساتھ میدان میں اترے گی کیونکہ شام میں پنک گیند کے سوئنگ ہونے کے امکانات زیادہ ہوتے ہیں۔
پاکستان نے اب تک دو مرتبہ ڈے نائٹ ٹیسٹ کھیلے جہاں ویسٹ انڈیز کے خلاف کامیابی اور آسٹریلیا کے خلاف ناکامی کا سامنا کرنا پڑا جبکہ سری لنکن ٹیم پہلی مرتبہ ڈے نائٹ ٹیسٹ کھیلے گی۔
ادھر پہلے ٹیسٹ میچ میں شکست کے بعد پاکستان کو رینکنگ میں تنزلی کا خطرہ درپیش ہے اور رینکنگ بچانے کیلئے پاکستان کو دوسرے ٹیسٹ میچ میں لازمین فتح درکار ہے۔
آئی سی سی ٹیسٹ رینکنگ میں پاکستان اس وقت 93 پوائنٹس کے ساتھ چھٹے اور سری لنکا 90 پوائنٹس کے ساتھ ساتویں نمبر پر موجود ہے۔
دوسرے میچ میں کامیابی سری لنکا کو ٹیسٹ رینکنگ میں چھٹے نمبر پر پہنچادے گی جب کہ پاکستان ساتویں نمبر پر چلا جائے گا۔
پاکستان اگر سیریز 2-0 سے ہارا تو اس کے پوائنٹس 88 اور سری لنکا کے 94 ہوجائیں گے جبکہ سیریز 1-1 برابر کرنے کی صورت میں قومی ٹیم 92 پوائنٹس کے ساتھ چھٹے نمبر پر موجود رہے گی۔
لائیو ٹی وی